Xil.Cali Maxamed Geeddi oo wada olole Siyaasadeed oo looga soo horjeedo Siyaasadaha Dowladda Federaalka Kmg.

(Nairobi, March 18, 2008 Ceegaag Online) 

Ra’iisal Wasaarihii hore ee Dowladda Federaalka Soomaaliya Cali Maxamed Geeddi haatana xubin ka ah Baarlamanaka KMG ah ayaa wada olole Siyaasadeed oo uu isaga tirtirayo eedeymihii loo jeediyay kol hore taas oo ay ka mid ahayd inuu lunsaday Lacagtii 30 iyo dhawrka Million ahayd ee Dowladda Sacuudiga ugu deeqday Soomaaliya.

Xildhibaan Geeddi oo sameystay Web Site ama Bog Interned ah http://www.soomaalidamaanta.com  kana shaqeeya nin Camerista u ahaan jiray isaga xilligii uu ahaa Ra’iisal Wasaaraha Soomaaliya ayaa lagu sheegay in Lacagtii Sacuudiga laga helay uu isticmaalay Madaxweyne Yuusuf kuna iibsaday hub iyo waxyaabo kale.

Sidoo kale Boggaas ayaa waxaa inta badan lagu soo bandhigaa aragtida Xildhibannada ka soo horjeeda Madaxweynaha Dowladda Federaalka Soomaaliya C/llaahi Yuusuf waxaana ka mid ah dadka ku sawiran bogaas oo Madaxweynaha dhaliilaha u jeedinaya rag iska waayay Golaha Wasiirada kol horena daacad u ahaan jireen Madaxweyne C/llaahi Yuusuf sida Xildhibaan Qaalid iyo C/llaahi Sheekh Ismaaciil.

Geeddi oo rajo ka qaba in mar kale Siyaasadda ku soo Laabto maadama 3 sano oo uu Maamulayay Siyaasadda Dowladda ku fashilmay Maamulkiisa inuu hanto Kalsoonida Shacabka ayaa waxaa uu doonayaa in mar kale ku soo laabto Loolanka Siyaasadeed ee dalka gaar ahaan Sanadka 2009-ka oo ah waqtiga ay ku egtahay Dowladda Federaalka.

Siyaasiyiinta taageersan in Geeddi dib u soo laabto ayaa waxaa ka mid ah Maxamed Qanyare, C/llaahi Sheekh Ismaaciil, C/kariin Faarax Laqanyo iyo xubno kale.

Geeddi intii uu Ra’iisal Wasaaraha ahaa waxyaabaha kalsoonida Shacabka ku waayay waxaa ka mid ah dagaalada iyo duqeynta aan kala reebka lahayn ee loo geystay dadka ku dhaqan Magaalada Muqdisho.

Geeddi oo Magaalada Nairobi ka iibsaday Guri uu lahaa hoggaamiyihii geeriyooday ee mucaaradka dalka Suudaan John Garang, waxaa uu sidoo kale sameeyay arrin dad badan ka yaabisay oo ah inuu Nairobi ku qabtay Arooska Wiilkiisa oo toddobaad socday kaas oo ku baxay qarash fara badan xilli dadka Soomaaliyed u dhaxeeyeen Macluul, dhimasho iyo gaajo.

Sidoo kale Xildhibaan Cali Maxmed Geeddi dhawaan ayuu guri ka iibsaday Magaalada Los Angeles ee Cariga Mareykanka sida lagu soo bandhigay Warbaahinta Calaamka.

www.ceegaag.com

webmaster@ceegaag.com