4-qof oo mid uu yahay askari ka tirsanaa Ciidamada dowladda oo ku dhaawacmay qarax ka dhacay suuq Bacaad.

(Muqdisho, May 03,  2008 Ceegaag Online)

4-qof oo mid uu yahay askari ka tirsan ciidamada dowladda ayaa ku dhaawacmay qarax lagu weeraray goob ay ciidamada dowladdu fariisin ku leeyihiin oo ku taala suuqa labaad ee ugu weyn magaalada Muqdisho ee suuq Bacaad.

Bam noociisu ahaa kuwa gacanta laga tuuro ayaa kooxo hubeysan ay ku weerareen laanta Horseed oo ku taala suuq Bacaad saldhigna u ah ciidamo ka tirsan kuwa dowladda, iyadoo qaraxaas kadib ay ciidamada dowladdu fureen tacshiirad.

Xaaladda suuqa ayaa mar kaliya noqotay mid kacsan, waxaana guud ahaan albaabada loo laabay goobihii ganacsiga ee suuqa, iyadoo ciidamo ka tirsan dowladda ay soo dhoobteen waddooyinka suuqaasi.

Dadka ku dhaawacmay qaraxa iyo tacshiiradii xigtay ayaa wararku sheegayan in loola cararay goobaha caafimaadka, iyadoo qaar kamid ah dadkaas xaaladooda caafimaad laga deyrinayo.

Laanta ciidamada Horseed ee ku taala ayna ku sugan yihiin ciidamo ka tirsan kuwa dowladda ayaa maalmihii ugu dambeeyey si joogto ah ay kooxo hubeysan waxa ay ugu weeraraan qaraxyo mararka qaar ay wehliyaan tacshiirado sababa dhimasho iyo dhaawac.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com