Afhayeenka Al-Shabaab oo sheegay in ay Bartilmaameedsanayaan Muwaadiniinta haysta Dhalashada Mareykanka.

(Muqdisho, May 08,  2008 Ceegaag Online)

Afhayeenka Ururka Al-Shabaab Sheekh Muqtaar Roobow Cali (Abuu Mansuur) ayaa markii ugu horeysay sheegay in ay beegsadaan muwaadiniinta u dhashay dalka mareykanka iyagoo u aargudaya hogaamiye sare oo kamid ahaa ururka Al-shabaab Aadan Ceerow oo ku geeriyooday duqeyn uu mareykanku ka geystay magaalada Dhuusamreeb.

Kadib shir jaraa'id oo uu qadka taleefanka ugu qabtay warbaahinta Muqdisho ayuu sheegay afhayeenka Al-shabaab in ay ka go'an tahay in ay u aargudaan raggii kaga dhintay duqeyntii ka dhacday magaalada Dhuusamareeb ee xarunta gobolka Galgaduud.

"Qof kasta oo heysta dhalashada mareykanka waan beegsan doonaa, waayo dhamaantood isku mid ayey noo yihiin, mareykanku wuxuu laayey dad xoolo dhaqato Soomaaliyeed ah, maxay dadkaasi galabsadeen ayuu is weydiiyey, inagana dadkooda xitaa waan beegsaneynaa" ayuu yiri Abuu Mansuur.

Abuu Mansuur oo sii hadlayey ayaa sheegay in xitaa ay beegsana doonaa shaqsiyaadka u shaqeeya hay'adaha samafalka ee wata dhalashada dalka mareynkanka, isagoo intaa raaciyey in mareykanka ka aar gudan doonaan meelkasta oo ay uga aar gudan karaan.

Wuxuu ka hadlay dagaallo ay shalay ururkooda la galeen ciidamada Ethiopia isagoo sheegay in ay dagaaladaas guullo ka gaareen ayna khasaare weyn gaarsiiyeen ciidamo Ethiopian ah oo ku kala sugnaa qaar kamid ah gobolada dalka Soomaaliya.

Waa markii ugu horeysay ee afhayeenka Al-shabaab uu saxaafadda ka sheego in iyagoo u aargudaya hogaamiyahoodii Aadan Ceerow ay beegsan doonaan muwaadiniinta heysta dhalashada dalka mareynka.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com