Afhayeenka Madaxweyanaha Xuubsireed oo si kulul uga jawaabay eedeyntii Channel 4.

(Muqdisho, May 28,  2008 Ceegaag Online)

Afhayeenka Madaxweynaha Soomaaliya Xuseen Maxamed Maxamuud (Xuubsireed) ayaa kadib shir jaraa'id oo uu ku qabtay magaalada Muqdisho wax kama jiraan ku tilmaamay eedeyn loo jeediyey qaar kamid ah Madaxda Dowladda Soomaaliya oo ay soo bandhigeen Warbaahinta Dalka England gaar ahaan wargeyska Daily Mail iyo TV-ga Channel 4.

Xuubsireed ayaa si caro leh u sheegay in ujeedooyin gaar ah laga leeyahay arrintaas, isagoo sheegay in aanu jirin sharci baneynaya in la fara galiyo nolosha qoysaska Madaxda Dowladda ee ku nool magaalada London ee Dalka Britain.

"Waa aflagaado ka dhan ah Madaxda Dowladda Federaalka Soomaaliya oo dano guracan laga leeyahay, dowladduna aad bey uga xun tahay arrintaas" ayuu yiri afhayeenka madaxweynaha Mr. Xuubsideed oo warbaahinta kula hadlayey magaalada Muqdisho.

Wuxuu sheegay in dowladda Soomaaliya ay dowladda Ingiriiska u gudbibeyso ashtako ka dhan ah wargeyska Daily Mail iyo TV-ga Channel 4 iyo guud ahaan intii ka qeyb qaadatay soo uruurinta warbixinta.

Wuxuu yiri " Waa arrin fool xumo ah in dhaleeceyn aan jirin dusha laga saaro madaxda dowladda oo naftoodii u haray qaranka Soomaaliyeed, si ay u badbaadiyeen shacabka Soomaaliyeed".

Hadalka Mr. Xuubsireed Afhayeenka madaxweynaha ayaa ku soo beegmaya xilli TV-ga Channel 4 iyo wargeyska Daily Mail ay baahiyeen warbixino sir ah oo muujinaya tacadiyo iyo xadgudubyo la sheegay in ay qaar kamid ah Madaxda dowladda ay ka geysteen gudaha dalka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com