Booliska Taraafikada oo lagu amrey in ay qaataan Hub si ay iskaga difaacaan dilalka lala beegsanayo.

(Muqdisho, May 10,  2008 Ceegaag Online)

Taliska ciidanka Booliska ayaa markii ugu horeysay ku amray ciidanka taraafikada ee waddooyinka in ay qaataan hub si ay naftooda uga difaacaan dilalka ka dhanka ah ciidamada dowladda ee ay badanaa geystaan kooxaha ka horjeeda dowladda Soomaaliya.

Saraakiil ka tirsan ciidanka booliska oo howlo kormeer ah ku tagay waddooyinka iyo isgoyska Muqdisho qaarkood ayaa la sheegay in ay ciidanka taraafikada ee waddooyinka ku amreen in ay soo qaataan hub si ay naftooda uga difaacaan kooxaha ciidamada dowladda dilalka u geysta.

Saraakiisha ciidanka ee kormeerka sameeyey ayaa guud ahaan ciidanka taraafikada waddooyinka waxa ay ku amreen in ay qaataan hubka, iyagoo ku goodiyey in ciddii ka dhaga adeegta laga joojin doono shaqada sida uu warbaahinta Muqdisho u sheegay mid kamid ah ciidana taraafikada ee waddooyinka ka howlgala.

Lama oga sababaha keenay in saraakiil ka tirsan ciidaamda booliska ay ku amraan ciidanka taraafikada in ay qaataan hubka, iyadoo ay aad u yar tahay dilalka lala beegsado ciidanka aan hubeysneyn ee taraafikada kuwaas oo ka howlgala qaar kamid ah waddooyinka magaalada Muqdisho.

Waa markii ugu horeysay ee ciidanka taraafikada lagu amro in ay hub qaataan si ay naftooda uga difaacaan dilalka ka dhanka ah ciidamada dowladda oo ay geystaan kooxaha ka horjeeda.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com