Ciidamada Ethiopia ayaa howlgallo ka bilaabay gudaha Magaalada Baledweyne.

(Baledweyne, May 12,  2008 Ceegaag Online)

Ciidamada Ethiopia ayaa howlgallo ka bilaabay gudaha magaalada Baledweyne, iyadoo xalay gudaha magaaladaas ay soo galeen ciidamadii ugu badnaa oo Ethiopian ah oo soo gala gudaha magaalada Baledweyne tan iyo markii ciidamada Ethiopia ay gaareen gobolka Hiiraan.

Wararka laga helayo magaalada Baledweyne ayaa sheegaya in ciidamo aad u fara badan ay xalay oo dhan ku soo qulqulayeen gudaha magaalada Baledweyne islamarkaana ay qeybo kamid ah magaalada ka bilaabeen baaritaano aan la ogeyn illaa iyo iminka waxa ay ku soo qabqabteen.

Sida warku sheegayaan ciidamada Ethiopia ayaa waxa ay wataan gaadiid badan oo nooca dagaalka ah, iyagoo ku sugan xarumaha dowladda ee magaaladaasi, waxayna gaaf wareegayaan wadooyinka dhexmara magaalada Baledweyne, iyagoo si aad ahna u feejigan, isla markaana diyaar u ah iney jawaab culus ka bixiyaan haddiiba weerar lagu soo qado ama qaraxyo lala beegsado.

Dadweynaha ku dhaqan magaalada Baledweyne ayaa si aad ah uga walaacsan ciidamadan Ethiopian-ka ah oo si aad ah uga fara badan kuwii horey loogu arki jiray magaalada bartamaheeda, waxaana dadku ay welwel ka qabaan khasaaraha ka dhalan kara haddii uu iska horimaad ka dhaco gudaha magaalada Baledweyne.

Ciidamada Ethiopia ayaa dhawaanahaan waxa ay deganaayeen meelo ka baxsan magaalada Baledweyne, hase ahaatee labadii maalmood ee ugu dambeeyey ayey ciidamada Ethiopia bilaabeen in ay isku balaariyaan gudaha magaalada Baledweyne ee xarunta gobolka Hiiraan.

Si kastoy ahaato arrintaan ayaa ku soo beegmeysa xilli ciidamada Ethiopia ay hub ka dhigis ku sameeyeen guddoomiyihii xilka laga qaaday ee maamulka gobolka Hiiraan Yuusuf Dabageed kadib markii ay kala wareegeen hubkii iyo ciidamadii ilaalada u ahaa.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com