Ciidamada Ethiopia ayaa saaka baaritaano ka bilaabay qeybo kamid ah degmada Yaaqshid

(Muqdisho, May 05,  2008 Ceegaag Online)

Ciidamada Ethiopia ayaa saaka baaritaano ka bilaabay qeybo kamid ah degmada Yaaqshid gaar ahaan xaafadaha Gubta iyo Towfiiq oo maalmihii ugu dambeeyey ciidamada Ethiopia ay dhaqdhaqaaqyo ciidan ka wadeen.

Ciidamo Ethiopian ah oo aad u fara badan ayaa saaka isku balaariyey deegaanadaas, waxaana wararka laga helayo halkaas ay sheegayaan in guud ahaan dadkii ku dhaqnaa xaafadahaas ay isaga carareen markii ay ciidamada Ethiopia ku soo faafeen degaanadooda waxaana dadkaas oo ka baqaya in ciidamada Ethiopia ay waxyeeleeyaan ay u baxsadeen deegaano kale.

Ilaa iyo hadda ma jiraan cid ay ciidamada Ethiopia qabqabteen iyo wax iska horimaad ah oo lala galay, waxaase xaalad kacsanaan ah ay ka jirtaa deegaanada ay isku balaariyeen ciidamada Ethiopia, waxaana suuragal ah in uu halkaas ka qarxo iska horimaad u dhexeeya ciidamada Ethiopia iyo kooxaha ka horjeeeda sida dhacda badanaa.

Deegaanka Towfiiq oo kamid ah halka ay saaka isku balaariyeen ciidamada Ethiopia ayaa maalintii shalay waxaa ka dhacay qarax ay daba socotay tacshiirad kaas oo ay ku dhinteen 3-kamid ah ciidamada Ethiopa ee farisinka ku leh garoonka ciyaaraha.

Ciidamada Ethiopia ee xarumaha ciidan ku leh hareeraha wadada warshadaha ayaa ah kuwa ugu badan ee sameeya dhaqdhaqaaqyada ciidan, waxaana ciidamadaas ay si joogto ah ula kulmaan weeraro iyaga ka dhan ah oo kaga yimaada kooxaha ka horjeeda.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com