Ciidamada Ethiopia oo Hub ka dhigis ku sameeyay Yuusuf Dabageed iyo warar kale oo ku saabsan Gobolka Hiiraan.

(Baledweyne, May 11,  2008 Ceegaag Online)

Warar lagu kalsoon yahay oo laga helay magaalada Baledweyne ayaa sheegaya in ciidamada Ethiopia ay hub ka dhigis ku sameeyeen guddoomiyihii hore ee maamulka gobolka Hiiraan ee xilka laga qaaday Yuusuf Dabageed.

Wararka ayaa tibaaxaya in ciidamada Ethiopia ay gebi ahaanba la wareegeen gaadiidkii dagaal ee uu lahaa Yuusuf Dabageed islamarkaana ay wixii hadda ka dambeeya la shaqeynayaan guddoomiyaha cusub ee loo magacaabay gobolka Hiiraan.

Ilo lagu kalsoon yahay ayaa sheegaya in guddoomiyaha cusub ee loo magacaabay Hiiraan in uu maanta gaari doono magaalada Baledweyn iyadoo amaanka magaalada Baledweyne ay iminka sugayaan ciidamo Ethiopian ah oo xalay saqdii dhexe soo gaaray.

Yuusuf Dabageed oo horay xilka looga qaaday ayaa tiro dhowr jeer ah waxa uu idaacadaha ka sheegay in uu weli yahay guddoomiyaha rasmiga ah ee gobolka Hiiraan islamarkaana aanu jirin cid xilka ka qaadi karta.

Arrinkan hub ka dhigista ah ee lagu sameeyey Yuusuf Dabageed ayaa ku soo beegmeysa xilli uu dhawaan shir jaraa'id oo uu ku qabtay Janta kundishe uu ku sheegay in uu ku soo wajahan yahay magaalada Baledweyne.

Dhinaca kale Magaalada Baledweyne ee xarunta gobolka Hiiraan ayaa waxaa saaka aroortii lagu arkay ciidamo fara badan oo Ethiopian ah kuwaas oo ku sugan gudaha magaalada gaar ahaan buundooyinka ku yaal magaalada Baledweyne ee buundo weyn iyo buundada Liiqliiqato.

Ciidamadaan Ethiopian-ka ah oo ka soo ruqaansada deegaanka Jante kundishe oo qiyaastii 5-KM u jirta magaalada Baledweyne ayaan la ogeyn sababaha ay u yimaadeen magaalada Baledweyne, hase ahaatee waxaa la sheegay in ay baaritaano ka bilaabeen magaalada.

Lama sheegin cid ay illaa iyo hadda ku soo qabqabteen baaritaanadaas, waxaana inta badan saakay xiran goobihii ganacsiga ee magaalada Baledweyne, waxaana dadku ay ka welwel qabaan in ciidamada Ethiopia ay ku qabqabtan baaritaanada ay ka wadaan gudaha magaalada Baledwyne.

Magaalada Baledweyne oo xarun u ah gobolka Hiiraan ayaa isbuucyadii la soo dhaafay aheyd meel uusan ka jirin wax maamul ah, waxaana magaalada maalmihi ugu dambeeyey gacanta ku hayey xoogagga ka horjeeda ciidamada Ethiopia iyo dowladda federaalka.

Soo gelitaanka ciidamada Ethiopia ee gudaha magaalada Baledweyne ayaa ku soo beegmeysa xilli la hadal hayo in uu magaalada soo gaaro guddoomiyihii hore ee xilka laga qaaday Yuusuf Dabageed oo ay wehliyaan ciidamo Ethiopian ah.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com