Ciidamada Ethiopia oo maanta culumaa'udiin Tabliiq ah ka kexeystay magaalada Baledweyne ee gobolka Hiiraan.

(Baledweyne, May 13,  2008 Ceegaag Online)

Ciidamada Ethiopia ee ku sugan gobolka Hiiraan ayaa maanta magaalada Beledweyne ka kaxeystay culumaa'udiin Tabliiq ah oo ku sugnaa magaalada Baledweyne, xilli ay ciidamadaas howlo baaritaano ah ka wadeen gudaha magaalada Baledweyne.

In ka badan 21 culumaa'udiin Tabliiq oo howlo faafin diineed ah ka waday gudaha magaalada Baledweyne ayey ciidamada Ethiopia ka qafaasheen magaalada Baledweyne, waxaana ay ula dhaqaaqeen meel duleedka ka ah magaalada oo ay xarumo ciidan ku leeyihiin.

Wararka laga helayo magaalada Baledweyne ayaa sheegaya in ciidamada Ethiopia xiliga ay kexeysanayeen culumaa'udiinka Tabliiqa ah ay magaalada ka wadeen howlgallo baaritanno ah kaas oo ay ka sameynayeen xaafadaha ay dadka rayidka ah deggan yihiin.

Falkaan ay ciidamada Ethiopia ku kexeysteen culumaa'udiinka Tabliiqa ah ayaa imaanaya xilli ay dhawaan ciidamada Ethiopia gowraceen culumaa'udiinkii ugu caansanaa Tabliiqa kadib markii ay ugu galeen masjidka weyn ee Al-Hidaaya oo ku yaala xaafadda Waxar Cadde ee Magaalada Muqdisho.

Ciidamada Ethiopia ayaa dhawaanahaan waxa ay ka wadeen gudaha dalka Soomaaliya falal ka dhan ah diinta Islaamka iyagoo badanaa beegsada xarumaha diinta dilalna u geysta Culumaa'udiinka Soomaaliyeed.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com