Ciidamadii Ethiopian-ka ahaa ee ku sugnaa degmada Buulo Burde ayaa xalay halkaasi isaga baxay.

(Buulo Burde, May 07,  2008 Ceegaag Online)

Ciidamadii Ethiopian-ka ahaa ee ku sugnaa degmada Buulo Burde halkaasi isaga baxay. habeenimadii xalay kadib markii dadka ku dhaqan degmada Buulo burde ayaa saaka ku waabariistay xarumihii ay deganaayeen ciidamada Ethiopia oo haawanaya.

Ciidamadaan ayaa la sheegay in ay degmada Buulo burde isaga bexeen saqdii dhexe ee xalay iyadoo aan si dhab ah loo ogeyn halka ay wajaheen.

Dadka ku dhaqan magaalada Buulo burde ayaa saakay arkay goobihii ay magaaladaas ka deganaayeen ciidamada Ethiopia oo haawanaya, waxaana dadkaas oo si raxan raxan ah u socda ay u daawasho tageen halkii ay faarujiyeen ciidamada Ethiopia.

Qaar kamid ah dadka ku nool magaalada Buulo burde ayaa soo dhaweeyey ka bixitaanka ciidamada Ethiopia ee degmada Buulo burde kuwaas oo sheegay in dhibaatooyin dhinacyo badan leh ay ku qabeen joogitaanka ciidamada Ethiopia gaar ahaan marka ay gudaha u soo galaan xaafaha degmada Buulo burde.

Ciidamada Ethiopia ayaa maalmihii u dambeeyey waday dhaqdhaqaaqyo ciidan kuwaas oo ay hada uga guurayaan xarumaha ay ka deggan yihiin iyagoo fariisimo cusub ka dhigayana xarumo kale.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com