Dawlada Somalia ayaa talaabo wanaagsan ku tilmaantay qorshaha Qaramada Midoobey ay xafiiskeeda ugu soo rareyso Somalia.

(Muqdisho, May 19,  2008 Ceegaag Online)

Ra'isal Wasaare kuxigeenka ahna Wasiirka Warfaafinta Ahmed C/salaan Xaaji Aadan ayaa sheegay in ay soo dhaweynayaan tallaabadaas haboon ee Qaramada Midoobey u qaaday xalka Soomaaliya.

Ahmed C/salaan ayaa sheegay in tani tahay fursad Soomaaliya dib lugaheeda isugu taageyso, isagoona tibaaxay in Qaramada Midoobey ay mar kale indhaheeda usoo jeedisay Soomaaliya.

"Waanu soo dhoweyneynaa Hadafkaas muhiimka ah, waxaana ay noqon kartaa xalka soomaaliya, hadii UN-ka indhahooda soo aadiyaan Soomaaliya oo ay xafiiskeeda usoo raraan Gudaha Somalia "ayuu yiri Ahmed C/salaan Ra'iisal Wasaare kuxigeenka Dowladda Federaalka Somalia.

Wasiirku wuxuu kaloo sheegay in tani ay sidoo kale fursad siineyso qorshaha ciidamada nabad ilaalinta Caalamiga ah lagu keeni lahaa Soomaaliya.

Qaramada Midoobey ayaa daraasadeynaya Qarashaadka ku baxaya Ciidamada caalamiga ah ee badali doona Kuwa Afrikaanka ee Amisom.

Kulan Golaha amaanka Qaramada Midoobey ka yeesheen Ciidamo geynta Soomaaliya wuxuu isku raacay in la helo dhaqaalaha ku bixi kara Ciidamadaas.

Ilaa iyo hada wuxuu Golaha Amaanka diyaariyay Ciidamo ka socda Dalalka India, Pakistan iyo Bangladesh, kuwaas oo iminka loo raadinayo dhaqaalihii ay ku howl gali lahaayeen.

www.ceegaag.com

webmaster@ceegaag.com