Dilal kala duwan oo maanta ka dhacay Magaalada Baydhabo ee xarunta Gobolka Bay.

(Baydhabo, May 11,  2008 Ceegaag Online)

Mid kamid ah ilaalada xildhibaan Maxamed Qanyare Afrax ayaa ku dhintay mid kalena waa uu ku dhaawacmay weerar ay kooxo hubeysan ku qaadeen hoyga uu ku leeyahay magaalada Beydhabo oo xarun u ah xubnaha barlamaanka Soomaaliya.

Weerarka oo ka dhacay hoyga xildhibaan Qanyare oo ku yaala xaafadda Cadaado ee magaalada Beydhabo ayaan la ogeyn cidda rasmiyan ka dambeysa, waxaana goobta gaaray weerarka kadib ciidamada amaanka magaalada Beydhabo.

Kooxihii weerarka ku qaaday guriga xildhibaan Qanyare ayaa la sheegay in ay hubkii ka qaateen labada nin ee ilaalada ka ahaa guriga Qanyare kuwaas oo midkood goor dambe uu ku dhintay isbitaalka magaalada Beydhabo ee xarunta gobolka Bay.

Illaa iyo hadda ma jirto cid sheegatay in ay ka dambeysay weerarka lagu qaaday guriga xildhibaan Qanyare ee ku yaala magaalada Beydhabo ee xarunta gobolka Bay.

Wararka qaar ayaa sheegaya in mid kamid ah ilaalada xildhibaan Qanyare uu ka dambeeyey weerarka inkasta oo aan warkaas weli si toos ah loo xaqiijin.

Xildhibaan Maxamed Qanyare Afrax oo ah xildhibaanka hoygiisa la weeraray ayaan illaa iyo hadda wax war ah ka soo saarin weerarka lagu qaaday hoyga uu ka deggan yahay magaalada Beydhabo.

Dhinaca kalena labo qof oo rayid ah ayaa geeriyootay kadib markii ay rasaas ku fureen ciidamo Ethiopian ah oo ku sugnaa magaalada Beydhabo kuwaas oo la sheegay in ay ilaalo la ahaayeen booyad biyo u dhaamineysay ciidamada Ethiopia.

Lama oga sababaha ay u dileen ciidamada Ethiopia dadka rayidka ah hase ahaatee warar ayaa sheegaya in dilka uu ka dambeeyey kadib markii ay ciidamada Ethiopia dadkaasi ka shakiyeen.

Dilalka ay dadka rayidka ah u geystaan ciidamada Ethiopia ayaa maalmihii ugu dambeeyey ku soo badanayey magaalada Baydhabo ee xarunta Gobolka Bay.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com