Dilal Salka ku haya aano qabiil ayaa kooxo hubeysan ka geysteen qeybo ka mid ah Gobolka Sh.Dhexe.

(Mahadaay, May 03,  2008 Ceegaag Online)

Dilal salka ku haya aano qabiil ayaa xalay kooxo hubeysan waxa ay ka geysteen qeybo kamid ah gobolka Sh/dhexe gaar ahaan deegaano hoostaga degmada Mahadaay ee gobolka Sh/dhexe.

Maleeshiyo beeleed hubeysan ayaa la sheegay in ay toogasho ku dileen labo qof oo midi ay haweeney aheyd tuulo la yiraahdo Dacar oo u dhow degmada Mahadaay kadib markii ay maleeshiyaadkaas weerar ku qaadeen qoys xoolo dhaqato ahaa oo ku dhaqnaa tuulada.

Wararka laga helayo magaalada Jowhar ayaa sheegaya in haweeneyda iyadoo dhaawac ah loo soo qaaday isbitaalka magaalada Jowhar hase ahaatee ay u geeriyootay dhaawacii ka soo gaaray tacshiiradii ay huwiyeen maleeshiyo beeleedka hubeysan.

Xaaladda degmooyinka Mahadaay, Biyo Cadde iyo tuulada Dacar ayaa aad u kacsan, waxaana deegaanadaas ka jira abaabulo dagaal oo ay wadaan maleeshiyo beeleedyo ka soo kala jeeda dhinacyadii wax dilay iyo kuwa wax lagadilay.

Dadaal ay wadaan waxgarad iyo odayaal ka soo kala jeeda dhinacyadaas ayaa iyagana ka socda deegaanadaas iyo magaalada xarunta u ah gobolka Sh/dhexe ee Jowhar, lamana oga in dadaaladaas ay hakin doonaan dilal iyo iska horimaad dhexmara maleeshiyo beeleedyadaas.

Degmooyinka Mahadaay iyo Biyo Cadde ayaa waxaa ku soo laablaabtay dilal loo geysto dad u badan xoolo dhaqato kuwaas oo loo dilo falal la xiriiraa aanooyin qabiil.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com