Dowladda Soomaaliya ayaa ku eedeysay Dowladda Eritrea in ay caqabad ku tahay geeska Africa.

(Muqdisho, May 08,  2008 Ceegaag Online)

Dowladda Soomaaliya ayaa ku eedeysay Dowladda Eritrea in ay caqabad ku tahay geeska Africa iyo shirka dib u heshiisiineed ee lagu wado in uu ka dhaco dalka Jabuuti sidaa waxaa lagu sheegay war saxaafadeed uu soo saaray agaasimaha guud ee wasaaradda arrimaha dibadda iyo iskaashiga caalamiga ah ee dowladda federaalka.

War saxaafadeedka ayaa lagu sheegay in dowladda Eritrea ay ku xad gudubtay madax banaanida dalka Jabuuti kadib markii sida war saxaafadeedka lagu sheegay ay qabsatay dhul ay leedahay dowlada Jabuuti taasna ay tahay xad gudub weyn oo ay Eritrea ku sameysay madax banaanida dalka Jabuuti.

Dowladda Eritrea waxa ay sidoo kale caqabad ku tahay shirka dib u heshiisiineed ee la filayo in uu ka dhaco dalka Jabuuti, waxaana ay fara gelin dhinacyo badan leh ay ku heysaa dhinacyada Soomaalida ee ka qeyb galaya shirka ayaa lagu yiri war saxaafadeedka ka soo baxay xafiiska agaasimaha guud ee wasaaradda arrimaha dibadda iyo iskaaashiga caalamiga ah.

Dalka Eritrea ee dowladdu Federaalka eedeynta ay u jeedisay ayaa waxaa xarun ku leh mid kamid ah kooxaha  mucaaradka ku ah Dowladda Federaalka Soomaaliya.

Ma ahan markii ugu horeysay oo Dowladda Soomaaliya ay sheegto in dowladda Eritrea ay caqabad ku tahay danaha dalka Soomaaliya iyo kan geeska afrika, hase ahaatee arrintaan ayaa ku soo beegmeysa xilli dhawaan la filayo in dalka Jabuuti uu ka dhaco shir dib u heshiisiineed oo lagu dhexdhexaadinayo Dowladda Federaalka Soomaaliya iyo Mucaaradkeeda.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com