Ergada Isbaheysiga Asmara oo ku gacan seyray hadalkii kasoo yeeray Yuusuf Indhacade.

(Jabuuti, May 14,  2008 Ceegaag Online)

Ku xigeenka guddoomiyaha golaha dhexe ee isbeheysiga dib u xoreynta ahna hormuudka xubnaha ka qeybgalaya shirka Jabuuti ayaa hadal aan jirin ku tilmaamay warkii shalay ka soo yeeray xoghayaha difaaca isbeheysiga Asmara Sheekh Yuusuf Maxamed Siyaad (Indhacadde).

Mas'uulkan oo la yiraahdo C/raxmaan C/shakuur ayaa sheegay in dhamaan xubnaha ku jira isbaheysiga dib u xoreynta ay ka warqabaan shirka islamarkaan kuwooda ku sugan gudaha Soomaaliya xitaa lagu war galiyey, hase ahaatee aanu garaneyn sababaha uu Yuusuf Indhacadde warkaas u sheegay.

Wuxuu xusay in Yuusuf Indhacadde yahay xubin muhiim ah oo ka tirsan isbeheysiga islamarkaana howlo wanaagsan ka wada gudaha Soomaaliya, hase ahaatee aaney aheyn haddiiba ay jiraan waxyaabo uu tabanaayo in uu warbaahinta ka sheego, basle ay aheyd in uu la soo xiriiro mas'uuliyiinta isbeheysiga.

"Yuusuf Indhacadde si aan ka fiirsasho laheyn buu u yiri hadalkaas, mana ahan in shaqsi sheeganaya mas'uuliyad uu warbaahinta hadaladaa oo kale ka sheego" ayuu yiri C/raxmaan C/shakuur oo ah ku xigeenka guddoomiyaha golaha dhexe ee isbeheysiga dib u xoreynta Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com