Ilaa Afar Nin oo Soomaali ah ayaa maanta Maxkamad lasoo taagayaa Dalka South Africa.

(Johannesburg, May 05,  2008 Ceegaag Online)

Ilaa afar nin oo Soomaali ah ayaa maanta maxkamad lasoo taagayaa ku taala dalka South Africa gaar ahaan  gobolka Eastern Cape, 3 ka mid ah ayaa loo heystaa dhac iyo dhaawac ay u geysteyn nin Soomaali ah oo ay dukaankiisa u dhaceen.

30-kii April, ayaa Xilli habeenimo ah waxaa ciidamada Police-ka ee Magaladda Humansdorp oo ku jooga kolonyo baabuur ah oo gaaraysa 40 baabuur oo nooca Dagaalka iyo raxan eeyo ah, isla markaasina adeegsanaya 2 dayuuradood oo nooca qumaatiga u kaca ah ee Helicopters-ka loo yaqaano ah, iyagoo waliba kaashanaya xubnaha maamulka Jaalliyada Gobolka Eastern Cape oo gawaari ku joogey ayaa waxa ay baacsadeen oo ay gacanta kusoo dhigeen illaa  3 nin oo Soomaali ah, kuwaas oo dhac iyo dhaawac u geystey wiil Soomaaliyeed oo inta ay dukaankiisa uhoydeen kadibna lacago ka dhacay, kadibna garabka ka toogteen. 

Dhinaca kale Maamulka Jaalliyada Soomaaliyeed ee Eastern Cape oo ka warheshay markiiba arrinta ayaa wargaliyey Police-ka, oo sidaasi layaabka leh oga jawaabay, sida la sheegey mid ka mid ah tuugada Soomaalida ah ee la qabtay ayaa ku cararay xeebta, kuna dhuuntey dhagax hoostiis, balse eey meeshaasi kasoo saartey dayuurad Helicopter ah oo nal ku qabatay, mid kale ayaa waxaa soo qabtay raxan Eeyo tababaran ah, Qofka afaraad oo ka mid ahaa Soomaalidii ciidanka caawineysay oo gurmadka ku jirtey , ayaa Police-ka waxa ay gaarigiisii ka dhex heleen qori sharci darro ah, kadibna waa la xirey, balse waxaa la ogaaday in qorigu uu ahaa mid ka dhacay Burcada Soomaalida ah markii ay baxsaneyeen, Dhamaantood ayaa maanta maxkamad lasoo taagayaa, halka wiilkii la dhacay dhaawacana ahaa (Khaliid Daahir) uu hadda ku jirro  Hospitaal  ku yaala  Magaalada P.E xaaladiisana ay wanaagsantahay,
  
Sida uu ii Xaqiijiyey  Mudane Muxuyadiin Nuur Jilley oo ah Madaxa maaliyada Jaalliyada ee gobolkaasi oo goob joog ahaa marka raga la qabanayay, nimanka ayaa ah kuwa lagu yaqaano buurcadnimo, waxaa la sheegey habeen ka hor habeenka ay falka geeysanayaan, ayaa la sheegey in ay sidoo kale dhac u geysteen wiil Soomaaliyeed oo meel mac-macaan ah ku leh faras magaalada P.E oo goor xilli dambe oo habeen ah ka codsaday in ay dhaweeyaan. Balse ay dhexda ku dhaceen. Mid ka mid ah raga ayaa sidoo kale la sheegey in uu sanad ka hor dhac ka geystey dukaan sidani oo kale uu ku hoydey.  

Arrintani ayaa waxaa cambaareeyey  Soomaali baddan oo maqashay, waxayna sheegeen in ragani ay ku tunteen sharaftii Soomaaliyeed, sidaasi darteedna aysan wax boos oga banaaneyn Soomaalida dhexdeeda. 

Si katsba ha ahaatee Waa markii ugu horeysey oo rag Soomaali ah ay dhacaan ama dhibaato kale u geytaan Soomaali kale, kiiskanina waxa uu soo jiitey dareenka Saxaafada dalka oo wax ka qortey, taasina waxay cadayn u tahay sida uu xasaasi u yahay, iyo waxa uu ka turjumayo oo aan ahayn wax ay Soomaali jeceshahay in ay maqlaan.

Hassan Yeey

Johannesburg, South Africa

yeey18@hotmail.com

webmaster@ceegaag.com