Is rasaaseyn xalay ka dhacday Xarunta Baarlamaanka Soomaaliya ee Magaalada Baydhabo

(Baydhabo, May 22,  2008 Ceegaag Online)

Kooxo hubeysan ayaa xalay weerar ku qaaday xarunta Hoolka shirarka Baarlamaanka Soomaaliya Magaalada Baydhabo sida ay sheegayan wararka naga soo gaaraya Magaaladaas.

Weerarkan hubeysan ayaa waxaa iska caabiyay ilaaladii xaruntaas iyagoo gurmad ka helayay Ciidamada Booliska iyo Ciidamada ilaalada Madaxtooyada Baydhabo.

Is rasaaseyntan oo socotay muddo ayaa waxaa la isu adeegsanayay hubka fudud sida uu sheegayo goobjooga ka dhawaa degaan ku dhaw xaruntaas Baarlamaanka ku leeyahay Magaalada Baydhabo.

Lama oga kooxda weerarka soo qaaday cidda ay ka tirsan yihiin hase ahaate Saraakiisha Booliska Baydhabo waxaa ay sheegayan in ay rumeysan yihiin in weerarkan ay ka dambeeyan kooxaha Dowladda ku kacsan.

Ilaa iyo hadda lama soo sheegin cid wax ku noqotay is rasaaseyntan haddii ay ahaan lahaayeen Ciidamada Booliska iyo kooxaha weerarkan soo qaaday

Saraakiisha ciidanka iyo maamulka gobolka midna kama hadlin iska horimaadka, waxaana saaka magaalada ka socda abaabulo lagu soo dhaweynayo madaxda sarsare ee dowladda oo la sheegay in ay halkaas kulamo kula qaadanayaan wafdi ka socda Qaramada Midoobay oo maanta ku soo wajahan magaalada Beydhabo.

Magaalada Beydhabo oo ah xarun Barlamaanka ayaa maalmihii ugu dambeyey waxaa hareeyey dilal iyo qaraxyo, iyadoo maamulka gobolka Bay iyo saraakiisha ciidanka ay sheegayaan in ay wadaan dhaqdhaqaaqyo ay ku xakameynayaan falalkaas.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com