Iska horimaad xalay ka dhacay gudaha Magaalada Kismaayo oo dhaliyay dhimasho iyo dhaawac.

(Kismaayo, May 17,  2008 Ceegaag Online)

Inta la og yahay hal qof ayaa ku dhintay qof kalena dhaawac ayaa ka soo gaaray iska horimaad xalay gudaha magaalada Kismaayo ku dhexmaray labo maleeshiyo beeleed oo midkood ay jidgooyo u taalay gudaha magaalada Kismaayo.

Iska horimaadka ayaa waxa uu ka dambeeyey kadib markii ilaalada dekadda Kismaayo oo doonayey in ay qaadaan bar jidgooyo ah oo ay maleeshiyaad hubeysan dhigteen meel ku dhow isbitaalka magaalada Kismaayo, waxaana iska horimaadka oo ahaa mid muddo socday ku naf waayey hal qof halka qof kalena uu ku dhaawacmay.

Goobta ay jidgooyada dhigteen maleeshiyada hubeysan ayaa waxaa ku xayirnaa gaadiid ka yimid dekadda iyo kuwa ku sii jeeday oo ay is hortaag ku sameeyeen maleeshiyada jidgooyada dhigatay.

Wararka laga helayo magaalada Kismaayo ayaa waxa ay sheegayaan in ilaalada dekadda Kismaayo ay ku guuleysteen in ay qaadaan jidgooyadii ay maleeshiyada hubeysan dhigteen wadada gasha dekadda taas oo ay si weyn u soo dhaweeyeen gaadiidleyda dekadda Kismaayo.

Magaalada Kismaayo oo ay ku badan yihiin maleeshiyaadka hubeysan ayaa waxa ku soo badanaya jidgooyooyinka iyo dilalka, waxaana kii ugu dambeeyey uu dhacay seddax maalin ka hor markii nin hubeysan uu tacshiirad huwiyey dad maqaayad ku shaahayey halkaas oo labo qof ay ku geeriyootay.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com