Israsaaseyn dhimasho iyo dhaawac sababtay ayaa maanta ka dhacday gudaha Magaalada Kismaayo.

(Kismaayo, May 22,  2008 Ceegaag Online)

Israsaaseynta ayaa timid markii ilaalada guddoomiyaha guddiga siyaasadda Beesha Sadde ay weerar ku qaadeen goob ay isbaaro u taalay maleeshiyo hubeysan.

Iska horimaad dhexmaray labada dhinac ayaa la sheegay in uu ku dhintay hal qof oo kamid ahaa dhinacyadii dagaalamay halka uu ku dhaawacmay mid kale oo ka tirsanaa maleeshiyaadkii uu iska horimaadku dhexmaraya.

Guddoomiyaha guddiga siyaasadda Beesha Sadde Yaasiin Nuur Gaas ayaa sheegay in ay wadaan qorshayaal ay magaalada Kismaayo kaga sifeynayaan jidgooyooyinka ay waddooyinka dhigtaan maleeshiyaadka hubeysa ee cidna ka amar qaadan.

Wuxuu intaas raaciyey in mas'uuliyiinta iyo maamulka magaalada Kismaayo ay arrintaan ka xaajoodeen islamarkaana ay isku afgarteen in jodgooyooyinka laga qaado waddooyinka magaalada si uu u hagaago isu socodka waddooyinka magaalada Kismaayo.

Bilowgii todobaadkan ayey aheyd markii sidaan oo kale uu iska horimaad ku dhexmaray magaalada Kismaayo ilaalada dekadda iyo maleeshiyo jidgooyo dhigatay wadada gasha dekadda magaalada Kismaayo ee xarunta gobolka J/hoose.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com