Kooxo Hubeysan oo toogasho ku dilay Mas’uul ka tirsanaa Shirkada Isgaarsiinta Nation Link.

(Muqdisho, May 08,  2008 Ceegaag Online)

Kooxo hubeysay ayaa toogasho ugu geystay bartamaha suuqa Bakaaraha mas'uul ka tirsanaa shirkadda isgaarsiinta Nation Link xilli uu mas'uulkaas ka cunteynayey maqaayad ku taala gudaha suuqa Bakaaraha.

Mas'uulka la dilay oo lagu magacaabi jiray C/laahi Baadil Dhiblaawe ayaa la sheegay in uu kamid ahaa mas'uuliyiinta shirkadda isgaarsinta Nation Link ee dhinaca waqooyi ee magaalada Muqdisho kaas oo aan la ogeyn ujeedada salka ku hayo dilkiisa.

Kooxihii geystay dilka mas'uulka ayaa goobta ka baxsaday markiiba, iyadoo marxuumka uu isla markiiba ku geeriyooday goobta markii ay melo halis ah uga dhacday rasaastii ay la beegsadeen kooxaha hubeysan.

Falka dilka ah ee loo geystay mas'uulka ka tirsanaa shirkadda isgaarsiinta Nation Link ee ka dhacay gudaha suuqa Bakaaraha ayaa dhacaya xilli ay suuqa ka howlgalaan ciidamo gaar ah oo ilaalo u ah suuqa weyn ee Bakaaraha kuwaas oo ay sameysteen ganacsatada suuqa Bakaaraha.

Dhinaca kalena kooxo hubeysan ayaa xalay dhaawac u geystay mid kamid ah ganacsatada caanka ah ee magaalada Muqdisho kadib markii isaga oo ku sugan meel ku dhow hoygiisa ay tacshiirad huwiyeen.

Dhaawaca ganacsadahaas oo la dhigay isbitaalka Madiina ayaa iminka warar aan helnay ay sheegayaan in lagu wado in loo qaado magaalada Nairobi ee dalka Kenya

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com