Kulanka Dib u Heshiisiinta ee maanta Jabuuti uga Furmidoona Dowladda Federaalka iyo Mucaaradkeeda oo shaki la galiyay.

(Djibouti, May 10,  2008 Ceegaag Online)

In kastoo Magaalada Jabuuti ee dalka Jamhuuriyada Jabuuti ay ku sugan yihiin Ergooyinka ka kala socda Dowladda Federaalka Soomaaliya iyo isbaheysiga Asmara iyo wafuud ka socota Qaramada Midoobay ayaa waxaa soo baxaya warar sheegaya in kulankaas bur buri doono marka la eego mowqifyada ay kala joogan Soomaalida kulankaas loo qabanayo.

Hoggaamiyaha Isbahaysiga mucaaradka Asmara Sheekh Shariif Sheekh Axmed,ayaa sheegay in aan isbahaysigu aqoonsaneyn dowladda Soomaaliya, isla markaana aan wax wadahadal ah oo toos ahi dhex mari doonin.

Hadalkani waxaa uu ku soo beegmay iyada oo wafdi ka socda Dowladda Soomaaliya iyo Mucaaradkeeda ayhada ku sugan yihiin Dalka Jabuuti halkaas oo lagu wado in uu maanta wadahadal uga furmo labadaas dhinac.

"Yaa la fadhiisahaynaa nimankan sheeganaya Dowlada wax gacan uga jira ma jirto, dadka Bani’aadamka waa uu gafaa, haddii ay yiraahdaan waan gafnay waxaa soo baxaya fursad wada hadal" ayuu yiri Sheekh Shariif

Waxaa uu kaloo sheegay Sheekh Shariif in ay wada hadal la geli doonaan Qaramada Midoobay iyo beesha Caalamka iyadoo laga wada hadlayo oo kaliya sidii Ethiopia looga saari lahaa dalka Soomaaliya.

Hadalada ka soo yeeraya Sheekh Shariif waxay wax u dhimi doonaan rajadii laga qabay in dhinacyada isku haya Soomaaliya ay wada hadlaan.

www.ceegaag.com

webmaster@ceegaag.com