Maareeyaha garoonka Galkacyo oo ka hadlay duqeyn ay shalay kooxo maleeshiyo ah u geysteen garoonka Magaalada Gaalkacyo.

(Galkacyo, May 31,  2008 Ceegaag Online)

Maareeyaha garoonka magaalada Galkacyo ee maamulka Puntland ayaa markii ugu horeysay ka hadlay duqeyn ay shalay kooxo maleeshiyo ah u geysteen garoonka magaalada Galkacyo ee xarunta gobolka Mudug.

Saciid Cabdi Dhagaweyne oo ah maareeyaha garoonka ayaa sheegay in duqeynta lagu qaaday garoonka ay dhalisay khasaare soo gaaray garoonka islamarkaana uu dab qabsaday qeybtii canshuuraha ee garoonka magaalada Galkacyo.

Wuxuu sheegay Mr. Dhagaweyne in loo baahan yahay in maamulka dhinaca koonfureed ee magaalada Galkacyo, waxgaradka iyo guud ahaan shacabka koonfurta magaalada Galkacyo ay u istaagaan sidii ay wax uga qaban lahaayeen dadkii ka dambeeyey aarintaan islamarkaana maxkamad loo keeni lahaa.

Wuxuu xusay in ay cawaaqib xumo xooggan ka dhalan doonto haddii ay sii socoto arrintaan, isagoo sheegay in ay tahay in raali gelin iyo magdhawba laga bixiyo dhacdadii ay kooxaha hubeysan ku weerareen garoonka Galkacyo.

Wararka laga helayo xarunta gobolka Mudug ee Gaalkacyo ayaa sheegaya in kooxihii shalay duqeeyey garoonka magaalada Galkacyo ay weli joogaan halkii ay garoonka ka duqeeyeen islamarkaana ay doonayaan in ay mar kale duqeyn u geystaan garoonka.

Duqeynta ay maleeshiyadaadka hubeysan shalay ku qaadeen garoonka magaalada Galkacyo ayaa la sheegay in uu salka ku hayo arrimo dhaqaale, iyadoo maleeshiyaadka garoonka duqeeyey ay ku cabanayaan in laga sad bursaday dhaqaalaha ka soo baxa garoonka Gaalkacyo.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com