Macalin Ajnabi ah oo wax ka dhigayey Jaamacadda Muqdisho oo maanta lagu afduubay Magaalada Muqdisho.

(Muqdisho, May 13,  2008 Ceegaag Online)

Mid kamid ah macalimiintii ajnabiga ahaa ee wax ka dhigayey Jaamacadda Muqdisho ayaa maanta kooxo hubeysan waxa ay ku afduubteen meel ku dhow isgoyska KM4 ee magaalada Muqdisho sida ay xaqiijiyeen mas'uuliyiin ka tirsan Jaamacadda Muqdisho.

Macalinka la afduubtay oo dhalashadiisu tahay dalka Kenya ayaa waxaa afduub u geystay kooxo hubeysan waxaana macalinka uu kamid ahaa macalimiimnta ajaanibka ah ee wax ka dhigta Jaamacadda Muqdisho oo kamid ah Jaamacadaha ugu waaweyn Magaalada Muqdisho.

Si dhab ah looma oga sababaha keenay afduubka loo geystay macalinka ajnabiga ah iyo cidda rasmiyan ka dambeysa, mana jirto illaa iyo hadda cid sheegatay in ay ka dambeyso afduubka macalinka ajnabiga ah.

Ma ahan markii ugu horeysay ee qof ajaanib ah afduub loogu geysto gudaha magaalada Muqdisho ee xarunta dalka Soomaaliya, waxaana arrintan ay imaaneysaa xilli ay sii yaraanayaan dadka ajaanibka ah ee ka shaqeeya gudaha dalka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com