Madaxii Hay’adda Horn Relief ee Jubooyinka oo xalay lagu dilay Magaalada Kismaayo.

(Kismaayo, May 18,  2008 Ceegaag Online)

Madaxii Hay'adda Horn Relief ee gobolada Jubbooyinka ayaa xalay rag hubeysan waxa ay ku dileen gudaha magaalada Kismaayo ee xarunta gobolka J/hoose gaar ahaan meel ku dhow hoygiisa.

Falka dilka ah ayaa waxaa geysteen kooxo ku hubeysnaa bastoolado islamarkaana wajiyada soo duubtay, kuwaas oo markii ay marxuumka dileen goobta isaga cararay.

Mas'uulka la dilay ayaa lagu magacaabi jiray Dr. Axmed Baariyow waxaana uu madax u ahaa hay'adda Horn Relief qeybteeda gobolada Jubbooyinka, waxaana uu shalay safar kaga yimid magaalada Nairobi ee xarunta dalka Kenya.

Lama oga cidda ka dambeysa dilka marxuumka oo si weyn looga dareemay guud ahaan magaalada Kismaayo ee xarunta gobolka J/hoose, waxaana wararku ay sheegayaan in ciidanka amaanka magaalada Kismaayo ay goobta gaareen kadib dilka.

Hay'adda Horn Relief ee uu madaxda ka ahaa marxuumka ayaa mashaariic badan waxa ay ka fulisay gobolada Jubbooyinka, iyadoo goobo waxbarasho ah ka furtay magaalooyin kamid ah kuwa gobolada Jubbooyinka.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com