Magaalada Muqdisho dagaalada kadib waxbarashadii, caafimaadkii iyo Ganacsigii oo isbadalay

(Muqdisho, May 11,  2008 Ceegaag Online)

Magaalada Muqdisho ee xarunta dalka Soomaaliya ayaa tan iyo markii ay ka dheceen dagaalada waxaa isbadal uu ku yimid qeybaha kala duwan ee lagama maarmaanka u ah nolosha sida ganacsiga, waxbarashada iyo caafimaadka kuwaas oo badankood meesha ka baxay markii ay sii baaheen dagaalada iyo duqeynta lagu sameeyey qeybo badan oo magaalada Muqdisho ah.

Waxbarashada.

Waxaa burburay iskuulo badan oo muhiim u ahaa waxbarashada kuwaas oo ay dhiganayeen kumanaan arday Soomaaliyeed ah kadib markii ay goobihii ay ku yaaleen iskuuladaas ay ku baaheen dagaalada islamarkaana ay qaarkood xarumo ciidan ka dhigteen ciidamada Ethiopia.

Iskuulada muhiimka ah ee magaalada Muqdsho sida weyn looga yaqaan ee ku burburay dagaalada Muqdisho ka socda ayaa waxaa kamid ah Machadka Siimad, iskuulka Axmed gurey, iskuulka Ablaal, iskuulka Al ma'muun, iskuula Al-cimra iyo iskuullo kale oo dhamaantood ay arday far badan wax ku baran jireen.

Kumanaan arday ah ayay iminka la soo gudboonaatay waxbarasho la'aan waxaana arday badankood ay ka carareen dagaalada Muqdisho iyo duqeynta ay ciidamada Ethiopia u geystaan xaafadaha Muqdisho, waxaana aad u yar tirada ardayda hadda wax barata marka loo eego xiliyadii aysan ciidamada Ethiopia soo gelin gudaha magaalada Muqdisho.

Caafimaadka.

Isbitaalo waawaeyn oo wax weyn ka qaban jira dhinaca caafimaadka ayaa iminka ah kuwa ku burburay dagaalada, waxaana qaar kamid ah isbitaaladaas saldhigyo ciidan ka dhigay ciidamada Ethiopia.

Isbitaalada burburay waxaa kamid ah Al-xayaat, Carafaad, Ayaan, Xasan Jiis, SOS iyo isbitaalo kale, waxaana iminka magaalada aad ugu yar xarumaha caafimaad ee wax u qabta dadweynaha xanuunsan.

Sicir bararka.

Magaalada Muqdisho iyo gobolada dalka ayaa waxaa saameyey sicir barar xooggan oo saameyn ku yeeshay nolosha malaayiin dad ah kuwaas oo ka cabanaya sicir bararka sii xoogeysanaya ee ka jira magaalada Muqdisho iyo gobolada dalka.

Tusaale ahaan.

Kiilada bariiska ah waxa ay gaartay inka badan 30-kun oo shilin Soomaali ah halka markii hore la iibin jiray wax aan ka badneyn 10-kun, kiilada burka waxa ay gaartay 35-kun halka markii hore la iibin jiray 10-kun, kiilada Baastada ah waxa ay gaartay 40-kun halka markii hore la iibin jiray wax ka yar 20-kun, liitarka saliid cadeyda ah waxa uu gaaray 42-kun halka markii hore uu ka ahaan 25-kun, liitarka saliid macsarada ah waxa uu gaaray 70-kun halka markii hore uu ka ahaa wax ka yar 30-kun.

Si kastaba ha ahaatee isbadalada ku yimid qeybaha kala duwan ee wax yaabaha asaasiga u ah nolosha aadanaha gaar ahaan dadka reer Muqdisho ayaa waxaa mas'uul ka ah dagaalada ka jira magaalada gaar ahaan xasuuqa iyo duqeynta aan kala go'a laheyn ee ciidamada Ethiopia ay ka geystaan magaalada Muqdisho kuwaas oo salfaday nolosha kumanaan qof oo Soomaaliyeed halka in ka badan 2-milyan oo qof ay u barakaceen gobolada dalka.

Xafiiska Wararka Ceegaag.com Muqdisho, Somalia

W/D: Wariye
Axmed Aadan Ibraahim
E:mail Axmedmadoobe@hotmail.com

webmaster@ceegaag.com