Nin hubeysan ayaa xalay labo qof ku dilay gudaha magaalada Kismaayo

(Kismaayo, May 14,  2008 Ceegaag Online)

Nin hubeysan ayaa xalay labo qof ku dilay gudaha magaalada Kismaayo ee xarunta gobolka J/hoose gaar ahaan xaafadda Aargada ee magaalada Kismaayo kaib markii uu tacshiirad huwiyey goob biibito ah oo ay dadku ku badnaayeen.

Ninka falka dilka ah geystay oo ku hubeysnaa qoro AK 47 ah ayaa la sheegay in uu doonayey in uu fal dil ah u geysto nin kale oo isna hubeysnaa oo kamid ahaa dadkii ku sugnaa goobta biibitada ah kaas oo isaga iyo nin kale oo dhalinyaro ah ay haleeshay rasaastii uu furay deetana ay u geeriyoodeen.

Gacnan ku dhiiglaha dilka geystay ayaa durba goobta ka baxsaday, waxaana muddo kadib goobta soo gaaray ciidamada amaanka magaalada kismaayo ee xarunta gobolka J/hoose kuwaas oo aan ku guuleysan in ay gacanta ku soo dhigaan ninka gacan ku dhiiglaha ah.

Magaalada Kismaayo ayaa waxaa amaan darii baahsan ku haya maleeshiyo beeleedyo hubeysan kuwaas oo falal u badan dilal, dhaca, kufsi iyo jidgooyo ka sameeya magaalada Kismaayo.

Falka dilka ah ee xalay ka dhacay magaalada Kismaayo ayaa imaanaya xilli dhawaan uu sheegay Xildhibaan Barre Hiiraale in uu wax weyn ka qabanayo amaanka Magaalada Kismaayo isagoo sidoo kale sheegay in uu sameynayo maamul ay u dhan yihiin beelaha ku dhaqan magaalada Kismaayo ee xarunta Gobolka J/hoose.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com