Qaar ka mid ah Xildhibaanada Barlamaanka oo wada Mooshin ka dhan ah Xukuumada  Nuur Cadde.

(Baydhabo, May 08,  2008 Ceegaag Online)

Magaalada Baydhabo oo ah xarunta gobolka Bay fariisinna u ah xubnaha Barlamaanka ayaa waxaa ka socda mooshin ka dhan ah xukuumadda Ra'isul wasaare Nuur Xasan Xuseen (Nuur Cadde) kaas oo ay wadaan qaar kamid ah xildhibaanada Barlamaanka.

Xubnaha Barlamaanka ee wada mooshinka ka dhanka ah Ra'isul wasaare Nuur Cadde ayaa ku doodaya in xukuumadda Nuur Cadde ay ka gaabisay wax ka qabashada xaaladaha ka jira dalka Soomaaliya gaar ahaan dhinaca amaanka.

Xubnahaan wada mooshinka ka dhanka ah Nuur Cadde ayaa waxaa kamid ah xildhibaan Cali C/laahi Cosoble kaas oo qaba in xukuumadda Nuur Cadde ay xiligaan tahay in ay meesha ka baxdo mar haddii ay ku guul dareysatay in ay wax weyn ka qabo dhibaatooyinka ka jira dalka Soomaaliya sida uu hadalka u dhigay.

"Mooshinkaan waxaa wada xubno fara badan oo ku jira Barlamaanka, illaa iyo haddana looma gudbin guddoonka Barlamaanka" ayuu yiri Cali C/laahi Cosoble.

Ra'isul wasaare Nuur Cadde ayaa isbuuc ka hor waxa uu hortagay Barlamaanka hortiisa halkaas oo ay su'aalo ku weydiiyeen xubnaha barlamaanka Soomaaliya, lamana oga waxa xiligaan ku soo beegay mooshinka ka dhanka ah ra'isul wasaaraha Soomaaliya  Nuur  Xasan Xuseen (Nuur Cadde).

Si kasta oo ay ahaato magaalada Baydhabo ayaa waxaa ka jira dhaqdhaqaaqyo siyaasadeed oo ka dhan ah xukuumadda Nuur Cadde kaas oo ay magaaladaas ka wadaan qaar kamid ah xubnaha Barlamaanka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com