QM ayaa ku baaqday in la joojiyo dilalka ka dhanka ah dadka rayidka ah ee ka dhaca Somalia

(New York, May 28,  2008 Ceegaag Online)

Qaramada Midoobay ayaa ku baaqday in la joojiyo xadgudubyada ka dhanka ah dadka rayidka ah ee sida joogtada ah uga dhaca dalal ay ku jirto dalka Soomaaliya.

Mas'uulka Qaramada Midoobay ugu qeysan dhinaca bini'aadanimada oo la yiraahdo John Holmes ayaa warkiisa ku sheegay in loo baahan yahay in la joojiyo dilalka macno darada ah ee lo geysto dadka maatada ah kuwaas oo uu sheegayaan in ay ku soo badanayaan dalal ay Soomaalia kamid tahay.

"Dagaalada iyo dilalka jira dalka Soomaaliya waa kuwo sii socda, waxaana markasta la beegsadaa dadka rayidka ee aan dagaalada ku lug laheyn" ayuu yiri Mr. John Holmes.

Wuxuu xusay in loo baahan in beesha caalamku ay u dhaqaaqdo sidii loo sameyn lahaa qubaro caalami ah oo arrimahaas baara si loo xaqiijiyo dilalka rayidka ah ee ka dhaca dalal caalamka ka tirsan.

Wuxuu sheegay in dalalka Soomaaliya, Sudan, Chad iyo Burundi ay horaantii sanadkan oo kaliya ku barakeceen dad kor u dhaafaya Nus Malyuun dad ah kuwaas oo ay saameeyeen dagaalada iyo dilalka ka jira dalalkooda.

Hadalka Mas'uulkaan ayaa ku soo beegmaya xilli dilalka dadka rayidka ah ay gudaha dalka Soomaaliya ka noqdeen kuwo joogto ah, iyadoo dilalka bartilmaameedka ah ay sii dheer tahay xad gudubyo ay geysteen ciidamada Itoobiya ee joogga gudaha dalka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com