QM oo shaacisay in  31-Bishan ay bilaaban doonaan Wadahadaladii Wajiga Labaad ee Dowladda iyo Macaaradkeeda.

(Nairobi, May 29,  2008 Ceegaag Online)

Qaramada Midoobay ayaa shaacisay in 31-bishan uu mar kale furmayo shirkii lagu heshiisiin lahaa Dowladda KMG iyo mucaaradka ka horjeeda sida lagu sheegay qoraal ka soo baxay xafiiska wakiilka gaar ah ee Qaramada Midoobay.

Wakiilka Qaramada Midoobay ee arrimaha Soomaaliya ayaa sheegay in mar kale la amba qaadayo shirka dib u heshiisiinta Dowladda KMG iyo mucaaradkeeda si loo afmeero dhibaatooyinka iyo dagaalada ka aloosan gudaha dalka Soomaaliya.

"Waa in la helaa qaab lagu xaliyo mashaakilka Soomaaliya, taasina waxay u baahan tahay wada hadal mar kale dhexmara kooxaha Soomaalida" ayaa lagu yiri qoraalka ka soo baxay xafiiska wakiilka gaarka ah ee Qaramada Midoobay. Wafuud kala mataleysa dowladda iyo mucaaadka ayaa lagu wadaa in ay 31-ka bishaan ku xaadiraan dalka Jabuuti si loo sii amba qaado shirka ay garwadeenka ka tahay Qaramada Midoobay.

Inkasta oo la filayo in shirka dib u heshiisiinta 31-da bishan uu mar kale ka furmo Jabuuti haddana waxaa jira khilaafaadyo hareeyey isbeheysiga mucaradka kaas oo isbeheysiga u kala qeybiyey labo dhinac oo ku kala aragti duwan wada hadal iyo dib u heshiisiin lala galo dowladda KMG.

Si kasta oo ay ahaato waxaa laga dhursugayaa natiijada ka soo baxda kulanka lagu balan san yahay in uu 31-ka bishaan ka dhaco magaalada Jabuuti ee xarunta dalka Jabuuti.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com