Roobab Xoogan oo socday in ka badan 12-saacadood ayaa xalay ka da'ay Magaalada Muqdisho

(Muqdisho, May 20,  2008 Ceegaag Online)

Roobab socday in ka badan 12-saacadood ayaa xalay ka da'ay magaalada Muqdisho iyo goobaha ku hareereysan kuwaas oo aan illaa iyo hadda la sheegin khasaare ay geysteen marka laga reebo qoysas badan oo ay roobabkaas saameeyeen sababo la xiriira hoy la'aan.

Roobabkaan oo bilowday saqdi dhexe ee xalay ayaa hakaday saakay abaaro 7:30 ee subaxnimo, waxaana ay reebeen Daadad fara badan, iyagoo waddooyinka Muqdisho dhigay biyo aad u badan.

Guud ahaa waxaa mudadii ay roobkaan ka socday magaalada gaar ahaan inta subaxnimo hakaday dhaqdhaqaaqii ganacisiga iyo gaadiidka kadib markii waddooyin badan oo ay gaadiidku isticmaali jireen ay biyo fariisteen.

Sida ay sheegayaan wararka laga helayo goobaha ay ku sugan yihiin dadkii ka barakacay magaalada Muqdisho ee ku teetsan inta u dhexeysa magaalada Muqdisho iyo Afgooye ayuu roobku saameyn xooggan ku yeeshay, waxaana qoysas fara badan ay cabasho ka muujiyeen hoy la'aan kadib markii goobihii ay deganaayeen ay biyaha roobku ugu galeen.

Inkasta oo marka si loo eego dadka iyo doonyadu ay si weyn ugu diirsadeen roobka haddana waxaa jira arrimo badan oo ka dhashay roobka kuwaas oo ay kamid yihiin cabasho ka soo yeereysa dadka barakacay iyo biyaha uu waddooyinka dhigay oo ay ka dhalan karaan caafimaad darro baahsan.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com