Sheekh Xasan Turki" Dagaal baanu la galeynaa ciidamada ka socda QM haddii ay yimaadaan gudaha Somalia".

(Kismaayo, May 25,  2008 Ceegaag Online)

Sheekh Xasan C/laahi Xirsi (Xasan Turki) oo kamid ah mas'uuliyiinta sarsare ee maxkamadaha ayaa maanta ku baaqay dagaal ka dhan ah ciidamada ka socda Qaramada Midoobay ee la filaayo in ay dalka yimaadaan sida lagu sheegay bayaan uu golaha amaanka ka soo saaray xaaladda dalka Soomaaliya.

Sheekh Xasan C/laahi Xirsi (Xasan Turki) ayaa wacad ku maray in ay dagaal la galayaan ciidamada Qaramada Midoobay haddiiba ay yimaadaan Soomaaliya, isagoo sheegay in shacabka Soomaaliyeed ay tahay in ay la dagaalamaan ciidamadaas.

"Meel kasta iyo goob kasta waan ku dagaalameynaa ciidamadaas, waxaanu u aragnaa in ay qeyb yihiin isticmaarka gaaladu ku heyso Soomaaliya, taasna ma ahan mid aanu indhaha ka laabaneyno" ayuu yiri sheekh Xasan turki.

Wuxuu sheegay in ay sii wadayaan dagaalka ay kula jiraan ciidamada Ethiopia ee ku sugan gudaha dalka Soomaaliya, isagoo sheegay in shacabka Soomaalida ah ay horey ugu guuleysteen dagaallo dhowr ah oo ay galeen gaar ahaan kii ciidamada UNISOM.

Wuxuu ku tilmaamay waxba kama jiraan shirka dib u heshiisiinta ee lagu dhexdhexaadinaayo mucaaradka iyo Dowladda KMG, isagoo shaaca ka qaaday in xiligaan aanuba jirin wax shir ah oo ay tahay in dalka laga xoreeyo ciidamada Ethiopia.

"Anigu waxaan kamid ahay cidkasta oo cadowga dagaalka kula jirta, kuwaas ayaanu ehel nahay oo aan kamid ahay" ayuu yiri Sheekh Xasan C/laahi (Xasan Turki) oo ka hadlayey cidda uu isagu urur ahaan kamid yahay.

Sheekh Xasan Turki ayaa ah shaqsi mowqif adag leh marka loo eego xubnaha mucaaradka, waxaana lagu tilmaamaa in uu kamid yahay shaqsiyaadka ad adag ee ku jira mucaaradka ka horjeeda siyaasadda dowladda iyo joogitaanka ciidamada Ethiopia.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com