Shirkii Dib u Heshiisiinta Dhinacyada Soomaalida oo galabta Toos uga furmaya Magaalada Jabuuti.

(Jabuuti, May 12,  2008 Ceegaag Online)

Xaflad si toos ah loogu furayo shirka dib u hesiisiinta ee dalka Jabuuti ayaa galabta lagu wadaa in ay ka dhacdo magaalada Jabuuti ee xarunta dalka Jabuuti, iyadoo la filayo in ay munaasabadda furitaanka shirka ay ka qeyb galaan mas'uuliyiin ka kala socota beesha caalamka.

Wararka laga helayo dalka Jabuuti ayaa sheegaya in xubnaha kala matalaya Dowladda Federaalka iyo mucaaradka ay ka soo qeb geli doonaan shirka taasna micnaheedu uu yahay in labada dhinac ay markaan diyaar u yihiin qabsoomidda kulan fool ka fool ah oo ay yeeshaan.

Kulanka furitaanka ah ayaa waxaa sidoo kale ka qeyb geli doona mas'uuliyiin sarsare oo ka socda Dowladda Jabuuti, iyadoo sida wararku sheegayaan la filayo in wasiirka arrimaha dibadda Jabuti Maxamuud Cali Yuusuf uu furayo shirka.

Xubnaha matalaya mucaaradka oo markii hore mowqif adag taagnaa ayaa iminka wararku sheegayaan in ay ka soo dabceen mowqifkoodii islamarkaana ay hadda diyaar u yihiin wada hadallo ay la galaan dowladda.

Goobta lagu qabanayo kulanka furitaanka ah ayaa waxaa ku sii qulqulaya madaxda beesha caalamka iyo madaxda Jabuuti, iyadoo sidoo kalena xubnaha labada dhinac ay gaari doonaan madasha kulanka uu ka dhacayo.

Si kastaba ha ahaatee waxaa labadii maalin ee la soo dhaafay magaalada Jabuuti ka taagnaa ismari waa u dhexeeya xubnaha labada dhinac, iyadoo xubnaha matalaya mucaaradka ay taagnaayeen mowqif adag oo ah in aaneyn wax kulan ah la yeelan doonin xubnaha matalaya dowladda Federaalka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com