Shisheeye Naceybka waa waxyeelo Dimoqoraadiyada Dalka South Africa hoos u dhigeysa.‏

(Johannesburg, May 13,  2008 Ceegaag Online) 

Dilalkii ka dhacay dalka South Africa garahaan Magaalada  Atteridgeville sanadkan horaantiisii, iyo weerarada Soomaalida loo geysanayo iyo ajaaniibta kale, ma ahan oo kaliya weerar shisheeyaha loo qeystey, sidoo kale waa waxyeeleyn weyn oo lagu sameeyey Demoqoraadiyada dalka ka jirta

”Sidaasi waxaa maanta shir jaraa’id ka sheegey afhayeenka xisbiga talada haya ee dalka South Africa  ANC Tiyani Rikhodsa oo dhaleeceyntii ugu xooga badneyd dusha uga tuurey rabshadaha socda.

Isagoo la hadlayay dadka wararka fidiya aqalka xarun madaxeedka xisbiga talada haya ee ANC, Luthuli House ee magalada Pretoria , ayuu sheegey afhayeenka xisbiga Tiyani Rikhodsa in waxa dhacay eey yihiin ficilo bulshada dib ugu celinaya waayadii midab takoorka iyo dhibaatada jinsi naceybka ee dalkan South Africa Ka jiri jirey, wuxuuna sheegey in xornimo u doonkii dalka lagu tilmaami karro mid dhicisoobey, haddii eey dalka waxani ka dhacayaan.

Wuxuu sheegey in ANC ay markale ku celinayso baaqeedii ahaa in wakaaladaha eey wax ka qabtaan dhibaatada ajaaniibta heysata, wuxuuna faray ciidamada nabad sugida in eey dabaqaan shuruucda socdaalka dalka, waliba si gacan mideeysan ayuu yiri Rikhodsa.  Ururka shaqaalaha dalka ee siyaasiga ah, COSATU ayaa dawlada hoose ee Johannesburg ugu baaqay in eey hoy siiso dadka barakacay, sidoo kale xisbiga mucaaradka ugu weyn dalka DA ayaa soo dhaweeyey in xabsiga loo taxaabo ku dhawaad 90 qof oo rabshadaha lala xariirinayo, wuxuuna xisbiga codsaday in talaabooyin haboon laga qaado waxa dhacaya.

dhinaca kale Garabka dhalinyada ee xisbiga hanti wadaaga (YCL) oo isagu saameyn siyaaseed ku dhex leh deegaanada eey waxka jiraan ee Alexandra ayaa sidoo kale cambaareeyyey falalka kuna baaqay deganaan iyo in ay dadka is qaboojiyaan.

Mar sii horeysey sargaal u hadlay machadka xariirka jinsiyadaha (Race Relations) oo lafa gur ku samaynayay sababta laga yaabo in eey hurineyso dhibaatada, ayaa sheegey in dalka eey ku suganyihiin inka baddan 5 milyan oo muhaajiriin ah , oo ka kala yimid wadamada Africa ee dhibaatada eey ka jirto, sidaaas darteedna marka tirade intaasi la eg oo ajaaniib ah eey dalka joogto la dareemi karro carada dadka deegaanka eey ka qabi karraan, wuxuuna dawlada xasuusiyey in markani loo baahnyahay in siyaasad wanaagsan laga qaado arrimaha socdaalka iyo muhaajiriinta, oo uu yiri siyaasada dabacsan ee dalka ka jirta ayaa saacidey kororka ajaaniibta intooda baddan uu ku sheegey dhaqaale doon.

Si kastaba ha  ahaatee Hadalkani ma ahan mid u wanaagsan dhagaha muhaajiriin baddan oo markani dareemaya in seefta ay qoorta ka saarantahay,

Hassan Yeey

Johannesburg, South Africa

yeey18@hotmail.com

webmaster@ceegaag.com