Siyaasadaha Dowladaha Qatar, Eritrea iyo Ethiopia oo ku lug yeeshay Wada hadalka ka socda dalka Jabuuti.

(Jabuuti, May 12,  2008 Ceegaag Online)

Waxaa soo baxaya in is jiid jiidka Siyaasadeed ee ka socda Magaalada Jabuuti ee dalka Jamhuuriyada Djibouti una dhaxeeyo kooxaha Soomaalida ay ku lug leeyihiin dalalka Eritrea, Qatar oo la safan Isbaheysiga Asmara iyo Itoobiya oo la safan Wafdiga Dowladda Federaalka Soomaaliya ka socda.

Ilo Wareed ku sugan Magaalada Jabuuti ayaa waxay sheegayan in lagu arkay Hotel-ka ay degan yihiin Wafdiga Isbaheysiga Asmara Safiirka Qatar oo halkaas ku meeraysanaya.

Lama oga waxyaabaha sababay in dalalka Eritrea iyo Qatar ay ku dadaalaan in ay sii kala fogeeyaan labada dhinaca ee Soomaalida iyadoo Itoobiya-na ay ciyaarayso kaalin ay ku fogaanayaan Xubnaha Dowladda Federaalka KMG.

Haddii dib loo eegana xiriirka 3-daas Xukuumadood ka dhaxeeya waxaa waaye, Itoobiya iyo Eritrea waxaa ka dhaxeeya colaad fogaatay oo la is dhihi karo waa ay adag tahay in mar dambe xiriir fiican uu dhex maro.

Itoobiya iyo Qatar-na maba isku wanaagsana, dhawaan ayay ahayd markii Dowladda Itoobiya xiriirkii u jartay Dowladda Qatar iyadoo ku eedeysay in Dowladda Qatar ay maalgeliso Mucaaradka Itoobiya, iyo Barmaamij laga sii daayay Tilifishinka Afka Carabiga ku baxa ee Al-Jazeera oo Caalamka loo soo bandhigay Tacadiyada iyo dhibka ay ku hayso Dowladda Ethiopia Muwaadidiinteeda ku dhaqan  Ismaamulka Deegaanka Soomaalida

Sidaas daraadeed dantii Shacabka Soomaalida waxay ku dhex dhuntay 3 daas Dowladood oo murankii ka dhaxeeyay u soo wareejiyay Wadanka ay Dagaaladu aafeeyeen ee Soomaaliya.

www.ceegaag.com

webmaster@ceegaag.com