Wararkii ugu dambeeyey ee shirka Jabuuti oo faah faahsan iyo kulamo gooni gooni ah oo ka socda Jabuuti.

(Djibouti, May 11,  2008 Ceegaag Online)

Wararkii ugu dambeeyey ee laga helayo magaalada Jabuuti ayaa sheegaya in ergayga gaarka ah ee Qaramada Midoobay ugu qeybsan arrimaha Soomaaliya uu wado dadaalo dhexdhexaadin ah oo uu isku soo hor fariisinayo xubnaha dowladda ee ku sugan dalka Jabuuti iyo kuwa mucaaradka.

Wararka ayaa sheegaya in wakiilka qaramada Midoobay uu kulamo gaar gaar ah la yeelanayo dhinacyada Soomaalida si uu uga dhaadhiciyo in ay isa soo hor fariistaan oo ay wada xaajood yeeshaan.

Waxaa lagu wadaa in galabta afarta galabnimo kulan uu ka dhaco magaalada Jabuuti kaas oo ay ka qeyb galayaan xubnaha ka socda Dowladda Federaalka Soomaaliya, danjirayaasha dowladaha shisheeye ka jooga dalka Jabuuti, wakiilka gaarka ah ee Qaramada Midoobey iyo xubno matalaya dowladda Jabuuti.

Kulanka ayaa natiijada ka soo baxda waxaa la shaacin doonaa marka uu soo afmeero sida ay sheegayaan wararka laga helayo dalka Jabuuti, waxaana sidoo kale jira kulan isna ay ka qeyb geli doonaan xubnaha mucaaradka kaas oo aan la shaacin xiliga uu dhacayo.

Dadaalo xooggan oo lagu dhexdhexaadinayo dhinacyada isku haya dalka Soomaaliya ee iminka ku sugan dalka Jabuuti ayaa si aad uga socda magaalada Jabuuti, waxaana wararka ugu dambeeya ay sheegayaan in wixii berri ka dambeeya ay isi soo hor fariistaan dhinacyada kala aragtida ah ee iminka Jabuuti ku sugan.

Xubnaha Dowladda Federaalka uga wakiilka ah shirka Jabuuti ayaa si weyn u muujiyey in ay diyaar u yihiin in uu qabsoomo kulan fool ka fool ah si loo dhameeyo mushkiladda ka aloosan gudaha Soomaaliya.

Dhinaca mucaaradka ayaa wararku sheegayaan in uu dhankooda weli ka jiro caga jiid, hase ahaatee waxaa weli jira dadaalo mucaaradka looga dhaadhicinayo in ay aqbalaan in ay kulan wada xaajood ah la galaan xubnaha dowladda uga wakiilka ah shirka.

Si kastaba ha ahaatee waxaa jira dadaalo aan yareyn oo ay xubnaha beesha caalamka oo uu ugu horeeyo wakiilka gaarka ah ee Qaramada Midoobey Ahmed Oulda Abdallah ay ku doonayaan in ay shirka Jabuuti ay ka soo baxaan natiijooyin wax ku ool ah oo lagu soo afmeero dhibta ka jirta dalka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com