Warshada baastada oo  Xarun u ah Ciidamada Ethiopia oo madaafiic lagu weeraray.

(Muqdisho, May 20,  2008 Ceegaag Online)

Madaafiic dhowr ah ayey maanta kooxaha ka horjeeda siyaasadda dowladda iyo joogitaanka ciidamada Ethiopia ku garaaceen qaar kamid ah xarumo ay ciidamada Ethiopia ka deggan yihiin magaalada Muqdisho.

Madaafiicda ayaa lagu duqeeyey xaruntii hore ee warshadda Baastada oo saldhig u ah ciidamada Ethiopia, waxaana wararku sheegayaan in ciidamada Ethiopia ay iyagana madaafiic kale ku jawaabeen kuwaas oo ku dhacay qeybo kamid ah degmooyinka Hurwaa iyo Yaaqshid.

Lama oga khasaaraha ka dhashay madaafiicda ku dhacay xarunta warshadda Baastada ee gaaray ciidamada Ethiopia iyo weliba kuwii ay ku jawaabeen oo iyagana ku dhacay deegaano ay dad rayid ah deggan yihiin.

Dhinaca kalena qaar kamid ah askarta ciidamada Ethiopia ayaa ku geeriyooday qarax maanta ka dhacay xaruntii hore ee kuliyadda Jaalle Siyaad kadib markii qarax nooca meelaha fog fog laga hago lala beegsaday.

5-kamid ah ciidamada Ethiopia iyo kuwa dowladda ayaa ku geeriyooday qaraxaas, lamana oga khasaaraha kale ee ka dhashay qaraxa.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com