Xildhibaan Barre Hiiraale ayaa sheegay inuu wax weyn ka qaban doono Amaanka sii xumaanaya ee Magaalada Kismaayo.

(Kismaayo, May 12,  2008 Ceegaag Online)

Xildhibaan Barre Aadan Shire (Hiiraale) ayaa ku celiyey mar kale in uu wax weyn ka qaban doono amaanka sii xumaanaya ee magaalada Kismaayo halkaas oo ay gudaha magaalada Kismaayo maleeshiyaad hubeysan dhigteen isbaarooyin oo dadka iyo gaadiidkaba lagu waxyeeleeeyo.

Barre Hiiraale ayaa sheegay in uu wado dadaalo uu wax kaga qabanaayo dhibaatooyinka ay maleeshiyo beeleedyada hubeysan ka wadaan bartamaha magaalada Kismaayo islamarkaana uu sidoo kale wado dadaalo la xiriira sidii beelaha kale ee ku dhaqan Jubbooyinka looga qeyb gelin lahaa maamulka magaalada Kismaayo.

Wuxuu sheegay in dadaalada uu isaga wado ay qeyb ka yihiin xubnaha Barlamaanka ee ku kala sugan magaalada, waxgaradka Beesha Sade iyo guud ahaan beelaha kale ee ku dhaqan Magaalada Kismaayo si loo soo celiyo amaanka magaalada Kismaayo oo xarun u ah goboka Jubadda hoose.

"Haddii aanan aniga garab la igu siinin dadaalada aan wado runtii aniga qudheyda waxba ma qaban karo, waa in la igu taageeraa dadaalada oo dhinac walba ay garab igu siiyaan" ayuu yiri Barre Hiiraale oo ah xildhibaan ka tirsan Dowladda Federaalka Soomaaliya.

Barre Hiiraale oo ay wehliyaan xildhibaano kale ayaa magaalada Kismaayo ka wada shirar looga arinsanayo waxa laga yeelayo amaanka faraha ka sii baxaya ee magaalada Kismaayo, waxaana shirkii ugu dambeeyey ay xubnaha Barlamaanka ee uu kamid yahay Barre Hiiraale la qaateen waxgaradka iyo siyaasiyiinta ka soo jeeda beesha Sade ee hadda gacanta ku haya maamulka magaalada Kismaayo.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com