Ciidamo ka wada tirsan maamulka Soomaliland oo isku rasaaseeyay Laascaanood.

(Laascaanood, November 08,  2008 Ceegaag Online)

Dalbac Maxamed Aadan Guul oo ka tirsan ciidanka millatariga Soomaaliland  iyo Booliska maamulka Soomaaliland ee gobolka Sool ayaa  saaka  iska horimaad aan dad ku dhiman ku dhexmaray barta loo calaamadiyay in laga dhiso rugta jaamacadda Laascaanood halkaas oo u dhaxaysa masjid jaamac wayn iyo maxkamadda gobolka. 

Mar aannu  manta khadka telefoonka kula xidhiidhnay xarunta gobolka Sool ee Laascaanood ayaa nalooga xaqiijiyay in Dalbac Maxamed aadan Guul uu weerar aan la ogayn waxa ka danbeeyay uu ku qaaday ciidamo boolis ah oo ku sugnaa goobta laga bilaabay dhismaha Jaamacadda .  

Maamulka ayaa shabakadda wararka ee Ceegaag u xaqiijiyay in Dalbac iyo gaadhigii uu watayba la qabtay loona dhaadhiciyay saldhigga booliska oo uu hadda ku suganyahay. Dalbac oo ka mid ahaa ciidamada qaranka Soomaaliland ayaa hadda waxaa baadhitaan la xidhiidha shaqaaqadaas dhacday si wada jir ah u wada ciidamada xoogga iyo booliska oo is kaashanaya.

webmaster@ceegaag.com