Xagee marayaan Wadahadalada uga furmay Jabuuti Dowladda Federaalka iyo Isbaheysiga Mucaaradka.

(Jabuuti, November 25,  2008 Ceegaag Online)

Shirka Jabuuti uga socda dhinacyada Dowladda Federaalka iyo Isbaheysiga Dib u Xoreynta ayaa galay marxalad aad u xasaasi u ah, iyadoona labada dhinac ay isku mari la'yihiin qodobo culus, iyadoona lagu soo waramayo in fadhiga u socda labada dhinac hakad la geliyay.

Gudiyo hoosaasyada Dowladda iyo Isbaheysiga ayaa isku heysta qaabka awood qeybsiga ay ku imaan karto Dowlad Midnimo qaran, waxaana Xubnaha Isbaheysiga ee uga qeyb galaya shirkaas ay soo jeediyeen in hadii la isku darayo labada dhinac uu Baarlamaanka ka koobnaado 120 xildhibaan oo ah 60 Dowladda Federaalka ah iyo 60 Isbaheysiga dib u xoreynta ah.

Xubnaha Dowladda Federaalka ee shirkaas uga qeyb galaya ayaa diiday soo jeedinta Isbaheysiga Dib u Xoreynta, waxaana ay sheegeen in Baarlamaanka oo ka kooban 275 mudane sidiisa loo daynayooo aan waxba laga dhimeen

Mas'uul u hadlay Garabka Isbaheysiga Dib u Xoreynta oo lagu magacaabo Maxamed Cali Ibraahim ayaa sheegay in la isku mari la'yahay qaabka wax loo qeybsanayo, isagoona sheegay in Xubnaha Dowladda ay ka soo horjeesteen in Baarlamaanka la dhimo oo lagu soo koobo 120 oo labada dhinac kala qeybsanayaan.

Labada dhinac ayaa u muuqda kuwo ku wada dhagan shuruudahooda oo aanay muuqan wax tanaasul, waxaan Isbaheysiga uu dalbanayaan in Baarlamaanka loogu kordhiyo 330 Xubnood maadaama ay ka kooban yihiin qeybo badan hadii Baarlamaanka aanay laga dhimin 275-ta Xildhibaan

Goobjoogayaasha Caalamiga oo ay ka mid tahay Qaramada Midoobey ayaa isku dayeysa inay is faham dhex dhigto Labada dhinac oo aanay ku kala tagin shirka oo galay marxalad cusub oo ka badalan tii hore.

www.ceegaag.com

webmaster@ceegaag.com