Aqalka Cad ee Maraykanka oo ka codsaday QM inay qeexdo awoodda lagula dagaalamayo kooxaha Burcad badeeeda Soomaaliyeed.

(USA,  November 22,  2008 Ceegaag Online)

Afhayeenka Aqalka Cad ee Maraykanka ayaa sheegay inay Xukuumadda Washington ay ka dalbanayso Golaha Ammaanka ee Qaramada Midoobay inay xaqiijiso qaababka ugu habboon ee lagula dagaalami karo laguna ciribtiri karo dableyda Soomaaliyeed ee maraakiibta ka qafaasha xeebaha dalka Soomaaliya.

“Kooxaha burcad badeeda ee afduubta maraakiibta Shisheeye waa kuwo aad u tababaran, isla markaana ay aad u sarreyso xeeladaha ay isticmaalaan militari ahaan iyo dhaqaale ahaan” ayuu yiri afhayeenka Aqalka Cad ee Maraykanka oo ka dalbaday Golaha Ammaanka inay kordhiso awoodda lagula dagaalamayo kooxaha Soomaalida ee afduubta maraakiibta.

Golaha Ammaanka ee QM ayaa horay qaraar qabyo uga soo saartay xeerarka dhinacyada badaha kaas oo ahaa mid xaddidan oo aan oggolaanayn in si buuxda looga hortago kooxaha afduubayaasha maraakiibta, balse xukuumadda Washington ayaa iminka ka doonaysa Golaha Ammaanka ee Qaramada Midooday inay qeexaan awoodda loo isticmaali karo ka hortagidda kooxahaasi oo ay sheegeen inay badaha Soomaaliya ka dhigeen kuwa ugu halista badan caalamka.

Maraakiib dagaal oo laga leeyahay dalka Maraykanka ayaa ku sugan xeebaha dalka Soomaaliya kuwaas oo la sheegay in uu wado hawl gallo lagu ilaalinayo xeebaha dalka Soomaaliya, waxaana markab dagaal uu Maraykanku leeyahay uu ku sugan meel u dhow halka ay kooxaha Soomaalida ku haystaan markabka hubka sida ee laga leeyahay dalka Ukraine.

www.ceegaag.com

webmaster@ceegaag.com