Madaxweyne Cadde Muuse oo Shir jaraa’id ku qabtay Xarunta Madaxtooyada ee Magaalada Garoowe...

(Garoowe,  November 22,  2008 Ceegaag Online)

Madaxweynaha maamul Goboleedka Puntland Maxamuud Muuse Xirsi (Cadde Muuse) oo maanta barqadii shir jaraa’id ku qabtay xarunta Madaxtooyada ee magaalada Garoowe ayaa ka hadlay Burcad badeeda Soomaliyeed ee dhibaatada ku haysa maraakiibta Shisheeye ee isticmaasha Biyaha Soomaliya iyo biyaha caalamiga ah ee ka baxsan Badweynta India…

Cadde Muuse ayaa ka dhawaajiyay inuu Maamulkiisa diyaar u yahay in uu ka qeyb qaato dagaalka lagula jiro burcad badeeda ee beesha caalamka ka wato xeebaha Soomaaliya.

Mar uu ka hadlayay Madaxweynaha Dowlad Goboleedka Puntland Burcad badeeda soomaaliyeed ayuu sheegay in sharaftii iyo Sumcadii Dadka Soomaaliyeed ay u luntay kooxo yar oo qowlaysato ah oo iimaanku ka tagay kadibna Magac xumo & sumcad daro usoo jiiday Soomaalida dalka ku nool & waliba kuwa dibada ku nool.

Dhinaca kale Madaxweynaha Dowlad Goboleedka Puntland Maxamuud Muuse Xirsi (Cadde Muuse) ayaa ka hadlay khilaafka u dhexeeya Madaxda sar sare ee Dowladda ee mudooyinkan soo ifbaxay, isagoo sheegay in taasi aysan aheyn wax qarsoon, balse maamul ahaan ay diyaar u yihiin in ay heshiisiiyan Madaxweyne Cabdullaahi Yuusuf Axmed iyo Ra’iisul Wasaare Nuur xasan Xuseen (Nuur Cadde).

www.ceegaag.com

webmaster@ceegaag.com