Bismilaahi Raxmaan Raxiim

Barnaamijka musharaxa xilka Madaxwaynenimo ee DGPL sanadka 2009

Mudane Khalif Xaaji Jaamac Cabdule (MANDELA).

Mudane Khalif ''Ma u baahan nahay in isbadal ka dhaco Puntland?

Haa ( Yes) waa loo bahan yahay in isbadal laga sameeyo Puntland ( We need change) waana awoodnaa, hadii aan iskaashano, waana qorshayn karnaa

isbadal ( We plan Change) anagoo mudnaanta kowaad siinayna dalka ( Frist Country ).'

Hordhac

Ugu horeyntii waxaan halkaan ka salamayaa bulshaweynta Soomaaliyeed meel kasta oo ay joogaan, waxaana u rajaynayaa midnimo iyo wanaag.

Salaan kadib, waxaan farxad ii ah inaa idin sheego inaan go'aansaday inaan isu taago tartanka madaxwaynenimada Dowlad Gobaleedka Puntland ee sanadka 2009.

Waxaa arintaas igu dhaliyay sababaha soo socda:

Kadib markii ay igu muuqatey in degaanka Puntland uu manta u bahan yahay isbadal, xaalada uu hada ku sugan yahay awgeed.

Anigoo canshuurtii dalka wax ku bartey, ayna waajib igu tahay inaa dib ugu abaalgudo dalkayga iyo dadkaygaba, isla markaana aan u huro maskaxdayda, xoogayga iyo wax kasto kale oo aan awoodo.

Iyadoo haatan dalka uu ku sugan yahay marxaalad adag, oo dadka intiisa badani ay qabaan sidaasi si ka duwan in la helo, isla markaana aan qabo inaan waxtar weyn ka gaysan karo, heer tayo lehna aan ku soo celin karno, markaan la kaashado gacana ka helo bulshaweynta Puntland ku dhaqan.

Degaanka Puntland waxaa ku nool dad kula duwan, waxayna intiisa badani u arkaan in dad kale hagaajintiisa laga sugaayo, aniguse waxaan qabaa inaan ka mid ahay dadka hagaajintiisa laga rabo, sidaas darteedna aan ugu soo istaagay musharaxnimada xilka Madaxwaynenimo.

Taariikhda Puntland.

Puntland waxaa la aasaasay 1998, waxayna arintaasi ku timid markii dagaaal sokeeye la soo marey 1991-1998, dowladii qaranka Soomaaliyeedna la waayey, markaas ayaa bulshada Puntland waxay go'aansatey inay samaysato maamul, si loo helo nabadgalyo, kala dambayn iyo horumar macna leh, waana lagu guulaystey arintaas.

Hadii aan halkaas kaga gudbo taariikhda Puntland, waxaan halkaan ku xusayaa barnaamijkayga wax qabasho, si bulshadu uga bogato, faahfaahintiisuna waa sidatan:

Nabadgalyada

Bulsho kasta oo meel ku nool waxaa saldhig u ah inay hesho ammaan iyo xasilooni joogta ah, taasna waxaa lagu heli karaa nabada oo saldhig u ah, horumar kasta oo bulshadu ku talaabsanayso, sidaa darted waxaan halkaan ku xusayaa sidii loo adkayn lahaa nabadgalyada guud, waana sidatan:

Sugida amniga Puntland ayadoo sida ugu wanaagsan loo maareynayo sidii wax looga qaban lahaa.

Dib u dhisida ciidamada Daraawiishta ee sugi lahaa nabadgalyada Puntland.

Xoojinta iyo dib u habaynta ciidamadii Booliska oo amniga deeganka ku shaqada leh.

Sugida iyo ilaalinta xuduudaha PL oo ah lagama maarmaan in la sugo.

Degaanada maamul Gobaleedka PL ee ka baxay gacanta maamulka soo celintooda, waana muqadas, arintaas oo salna u ah midnimada PL.

Arimaha Bulshada

Adeega guud ee bulshada waa kaalin muhiim ah, si gaar ahna xasaasi u ah loona baahan yahay in mudnaanteeda la siiyo, sida Tacliinta, Caafimaadka iyo Shaqo abuurista oo kor loo qaado.

Sida tayada arimaha bulshada kor loogu qaado waa in Dumarka iyo Dhalinyaradu kaalin mug leh ka qaataan, isbadal kasta oo dalka lagu horumarinaayo.

Waxaa kale oo muhiim ah daryeelka guud ee bulshada, taas oo kaabaysa nolashooda iyo wixii taakulayntooda la xiriira.

Waxaan ku dadaalaynaa dadka Soomaaliyeed ee tahriibka ku dhimanaya inaa wax ka qabano.

Dhaqaalaha iyo Horumarinta

Dhaqaalaha maamulka PL oo iska kooban, waxaa loo baahan yahay in loo beeqaamiyo si qorshaysan si loo helo mushaarka ciidamada, wasaaradaha iyo adeega guud ee hore u socodsiinta.
 

Waa in miisaaniyada dhaqaale loo sameeyo qorsho gobaleed horumarineed sida qorsho dhaw, mid dhaxe iyo mid fog.

Waa muhiim in kaabayaasha dhaqaale la xoojiyo sida dekadaha, garoomada diyaaradaha, jidadka iwm.

In la abuuro / la sameeyo iskaashi guud ee dhaxmara wax soo saarka guud, wax soo saarka gaarka ah iyo kan bulshada ee samafaleed.

Xiriirka Dibadda

Hagaajinta xiriirka gudaha iyo dibaddaba waa laga maarmaan, waxaana aas aas u ah qodobadaan soo socda:

Xoojinta iskaashiga hay'adaha deeqaha bixiya si looga helo kaalmooyinkooda samafaleed.

Dalalka dariska nala ah waa inaa xiriir wanaagsan la yeelano, si nabadgalyo loogu wada noolaado.

Ma u baahan nahay in isbadal ka dhaco Puntland?

Haa ( Yes) waa loo bahan yahay in isbadal laga sameeyo Puntland ( We need change) waana awoodnaa, hadii aan iskaashano, waana qorshayn karnaa

isbadal ( We plan Change) anagoo mudnaanta kowaad siinayna dalka ( Frist Country ).

Sababaha aan u rabno isbadalka waa sidatan:

1. Nabadgalyadii oo xumaatey, soo Celina u baahan.

2. Dhaqaalihii oo wiiqmay wax ka qabadna u baahan si loo soo kobciyo.

3. Horumar oo aan jirin u howl gal la'aan awgeed.

4. Gobalada ka maqan Puntland oo soo celin u baahan, iyadoo loo marayo hab wada xaajood iyo mid wada tashi oo ay yeeshaan dadka Puntland, oo ah sidii xalku ku jiro.

5. Burcad badeedka abuurantey una baahan in xal loo helo, si jiritaanka iyo sharafta Puntland loo dhawro.

6. Jiha siyaasadeed oo aan jeexnayn ( Political direction).

7. In la helo qaab ku dhisan xukun wanaag Dimuqaraadi ah (Good govermence)

8. Majare u dhigida mustaqbalka Puntland ( Foundation stone for the Puntland future).

9. Shaqo u abuurid la'aan dhalinyarada suuqa ku daadsan, oo loo baahnaa in loo abuuro xirfado shaqo oo ay ku shaqaystaan, taas oo kaabi lahayd nolashooda.

Gabogabo

Waxaan ka codsanayaa shacabka Puntland inay gacan igu siiyaan sidii aan ugu guulaysan lahaa doorashada madaxtinimada Dowlad gobaleedka Puntland, si aan u hirgaliyo barnaamijka aan soo xusay, kaas oo dan u ah degaankeena.

Waxaana u rajaynayaa shacabka dowlad gobaleedka Puntland guul, horumar, barwaaqo iyo nabad waarta.

Mahadsanidiin

Musharaxa xilka madaxwaynenimo DGPL 2009

Mudane Khalif Xaaji Jaamac Cabdule ( Mandela)

Voteforkhalifjama@gmail.com

Puntland, Somalia