Ciidamada Burundi ee fadhiisinka ku leh Jaamacadii hore ee Ummada oo xalay la weeraray.

(Muqdisho, October 03,  2008 Ceegaag Online)

Xalay saqdii dhexe ayaa mar qura waxaa la maqlay daryanka madaafiicda iyo rasaasta ka dhacaysa qoryaha daran dooriga u dhaca kuwaas oo ay xoogaga  ka horjeeda joogitaanka ciidamada Shisheeye ay weerar ku qaadeen fariisin ay ciidamada Burundi ku leeyihiin Jaamacadii hore ee Ummada.

Dagaalka oo u muuqday mid si aad ah loo soo qorsheeyay ayaa bilaawday abaaro12:15 daqiiqo saqda dhexe iyadoo hubka la isku ridayayna laga maqlayay qeybo badan oo ka mid ah magaalada Muqdisho.

Weerarka oo la isku adeegsaday hubka noocyadiisa kala duwan ayaa dhaliyay qasaare dhimasho iyo dhawac dad rayid ah oo aan ilaa hada la hubin tiradoooda iyo burbur hantiyeed, sida la xaqiijiyay xaafada Macmacaanka ee degmeda Wadajir ayaa waxaa ku habsaday madfac habow ah.

Madfaca oo ku dhacay  warshad barafka sameysa, waxaana halkaasi uu dhaawac uu ka soo gaaray labo qof oo ka agdhawaa warshada, iyadoo warshadiina ay ku burburtay sida ay Ceegaag Online u sheegeen dadka deegaanka.

Sidoo kale waxaa wali isa soo taraya qasaaraha uu geystay weerarakii xalay lagu qaaday ciidamada Burundi ee ka tirsan ciidamada Midowga Africa (Amisom) ee nabad ilaalinta u jooga gudaha Soomaaliya.

Weerarada lagu qaado ciidamada Nabad ilaalinta ee AMISOM ayaa soo xoogeysanaya maalmihii ugu dambeeyay, iyadoo ay barbar socoto qax iyo Barakac dadka rayidka ah ay guryahooda uga cararayaan.

www.ceegaag.com

webmaster@ceegaag.com