Duqeyn xalay saqdii dhexe loo geystay Magaalada Baydhabo.

(Baydhabo, October 15,  2008 Ceegaag Online)

Xoogaga Dhalinyar diimeedka Al-Shabaab ayaa xalay duqeyn loo adeegsaday Madaafiic waa weyn u geystay Xarunta Madaxtooyada iyo Garoonka Diyaaradaha ee Magaalada Baydhabo halkaas oo fariisin u ah Ciidamo Itoobiya ah iyo kuwo Dowladda Federaalka Soomaaliya.

Duqeyntan oo socotay muddo daqiiqado ah ayaa la aaminsan yahay inay ka dhasheen dhimasho iyo dhaawac aan ilaa iyo hada cadadooda la heyn, hase ahaatee sida ay ilo wareedyo ku waramayaan waxaa Cisbitaalka Baydhabo la dhigay Dhaawacyada ilaa sadex askari oo ka tirsan Ciidamada Milateriga Dowladda Soomaaliya kuwaas oo ku dhaawacmay Madaafiic lala helay Hoyga Madaxweyne Yuusuf, Xarunta Barlamaanka iyo garoonka Diyaaradaha.

Warar kale ayaa sheegaya in askarta ka tirsan Ciidamada  Itoobiya ay sidoo kale duqeyntaas ku dhaawacmay  kuwaas oo ku jiray teendho yar oo bariga Garoonka taalay.

Ilaa 15 Madaafiic ayaa la xaqiijiyay inay ku dhaceen Hoyga Madaxweynaha ee Magaalada Baydhabo iyo Garoonka, kaas oo ahaa duqeyn hoobiyeyaal loo adeegsaday oo ay Xoogaga Dhalinyaro Diimeedka Al-shabaab la bartilmaameedsadeen xarumahaas

Ma ahan wax ku cusub dadka Reer Baydhabo weerarada madaafiicda iyo kuwa tooska ah ee ka dhaca Magaalada Baydhabo, waxaana mudooyinkii u dambeeyay isa soo tarayay weeraro madaafiic oo lagu qaadayo Xarunta Madaxtooyada, Xarunta Xubnaha Barlamaanka iyo Garoonka Diyaaradaha oo ay ku sugan yihiin Ciidamada Dowladda Federaalka Soomalaiya iyo kuwa Itoobiya

www.ceegaag.com

webmaster@ceegaag.com