Sheekh Aadan Madoobe oo ka warbixiyay socdaalka Nairobi ee DFS iyo Urur goboleedka IGAD.

(Nairobi, October 19,  2008 Ceegaag Online)

Guddoomiyaha Baarlamaanka Dowladda Federaalka Soomaaliya Sheekh Aadan Max’ed Nuur (Sheekh Aadan Madoobe) ayaa faah-faahin ka bixiyay ujeedada ka dambeysa u yeeritaanka Urur goboleedka IGAD ay Madaxda Dowladda Federaalka iyo labada gole ee dawladda uga yeeraan magaalada Nairobi ee dalka Kenya.

Sheekh Aadan Madoobe wuxuu sheegay in hadafka ka dambeeya u yeeritaankooda magaalada Nairobi ay tahay in la dhamaystiro madmadowga u dhexeeya madaxda sare ee dawladda federalka Soomaaliya oo dhinac ah iyo kala qeybsanaanta xubnaha Barlamaanka Soomaalida.

Guddoomiyaha Baarlamaanka Dowladda Federalka Soomaaliya Sheekh Aadan Madoobe wuxuu sheegay in magaalada Nairobi uu kulan kula yeeshay wasiirka arrimaha dibadda dalka Kenya, uuna u sheegay in kulanka ay dawladda federalka iyo madaxda urur goboleedka IGAD ku yeelanayaan magaalada Nairobi uu yahay mid lagu doonayo in lagu saxo waxyaabaha qaladaadka ah dhaliyay khilaafka ah sida wasiirada iska casilay xukuumadda oo Baarlamaanka kalsoonida kala noqday.

Sheekh Aadan Madoobe wuxuu sidoo kale sheegay in kulanka dhex maraya urur goboleedka IGAD iyo dawladda federalka lagu soo qaadi doono halka ay marayaan dadaallada nabadda ee dawladda federalka iyo isbahaysiga dib-u-xoreynta iyo waxa ka hirgalay qodobadii ay ku kala saxiixdeen dalka Jabuuti.

Hadalka Guddoomiyaha Baarlamaanka ayaa imanaya xilli ay jireen tuhuno badan oo ku aaddan ujeeddada ka dambeysa u yeeritaanka Dowladda Federaalka ee magaalada Nairobi iyo talaabada xigidoonta.

www.ceegaag.com

webmaster@ceegaag.com