Abuu Mansuur oo ka hadlay Go'aankii lagu xiray garoonka diyaaradaha ee Muqdisho.

(Bakool, October 09,  2008 Ceegaag Online)

Afhayeenka xarakada Al Shabab Sheekh Muqtaar Rooboow Abuu Mansuur oo saaka qadka taleefonka shir jaraa'id ku qabtay ayaa ka hadlay arimo dhowr ah oo ay ku jirto xirnaashaha garoonka diyaradaha Muqdisho.

Abuu Mansuur ayaa sheegay in go'aankii ay kooxdooda ku xireen garoonka diyaaradaha Aadan Cadde airport aysan ahayn aayad Qur'aan ah oo soo degtay balse hadii ummada isu timaado oo ay ka wada hadlaan meelna la saaro arimihiisa waxaa dhici karta in dib loo furo ayuu yiri Sheekh Muqtaar.

Waxuu sheegay oo kale in garoonka ay si toos ah u isticmaalaan waxa uu ku sheegay cadawga Alle iyo kan muslimiinta, sidaas daraadeena loo xiray inaysan ka soo dajin hub danbe iyo ciidan ku soo duula dadka iyo dalka Soomaliya.

Afhayenka oo shirkiisa jaraa'id uu dheera ayaa dhanka kale  beeniyay wararka sheegaya in Al Shabaab ay handadaad u geysten afhayeenka golaha dhaqanka beelaha Hawiye, waxuuna cadeeyay in odayaashaasi mujaahidiinta dartood loo dhibaateeyay ayna raali kooxdooda ka ahayn in loo hanjabo.

Isagoo sii wata hadalkiisa ayuu ku tilmaamay Axmed Diiriye nin waalid u ah mujaahidiinta " waan maqalnay in nin uu masjid dhaxdiisa wax uga sheegay odayaasha laakiin waanu u cadeynaya inaan anaga ahayn ninkaasina uusan naga tirsanayn" ayuu hadalkiisa raaciyay.

Mar la weydiiyay in shirkadaha diyaaradaha ee Shacabka ah ay xarakadooda lacago baad ah weydiisteen ayuu Abuu Mansuur gaashanka ku dhuftay inay jirto taas, waxuuse sheegay in qaar ka mid ah shirkadahaasi ay iyaga la soo doonteen inay lacago siinayaan waana ka diidnay ayuu yiri Afhayeenka xarakada Islaamiga ah ee Al Shabaab Sheekh Muqtaar Roobow Abuu mansuur.

Shirkan jaraa'id ee uu saaka qabtay Afhayeenka Al Shabaab ayaa u muuqda mid dabcinaya mowqifkii ay kooxdooda ka qabeen xirnaashaha garoonka Muqdisho, iyadoo maalmihii ugu danbeeyay ay socdeen kulamo looga arinsanayay xirnaanshaha garoonka.

www.ceegaag.com

webmaster@ceegaag.com