|
Aqoon isweydaarsi dalka
K/Afrika uga furmay guddiyada Amniga iyo siyaasadda ee
Dowladda KMG iyo Isbaheysiga Dib u xoreynta.
(Cape Town.
October 11,
2008 Ceegaag Online)
Xubno ka
tirsan Guddiyada Amniga iyo Siyaasadda Dowladda KMG iyo
Isbaheysiga Dib u xoreynta (garabka Sheekh Shariif) ayaa
aqoon isweydaarsi uga furmay dalka Koonfur Afrika,
waxaana xubnaha ka qeyb gelaya seminaarkaasi ay
gaarayaan ilaa 22-xubnood oo ka kala socda labada dhinac.
Seminaarkaasi oo ay soo qabanqaabisay Qaramada Midoobay
isla markaana maanta ka furmay magaalada Cape Town ee
caasimada dalka K/Afrika ayaa ku saabsan sidii guddiyada
ka socda Soomaaliya ee labada dhinac ah ay u kororsan
lahaayeen waaya aragnimo la xiriirta sidii loo xalin
lahaa khilaafyada siyaasadeed ee dalkooda ka jira.
Wufuuda
labada dhinac oo iyagu wadanka K/Afrika gaaray muddo
saddex maalmood kahor isla markaana isaga kala yimid
dalalka Jabuuti, Soomaaliya iyo Kenya ayaa waxaa
casharada Seminaarkaasi siinaya madax ka socota dalalka
Afrika, gaar ahaan dalalka Uganda, Burundi, Nicaragua
iyo dalal kale, kuwaasi oo la sheegay inay iyagu hore u
soo mareen khilaafyo siyaasadeed iyo dagaallo sokeeye.
Madaxda
Afrika ee iyagu macallimiin ka ah aqoon isweydaarsigaasi
ayaa hore ugu guuleystay inay xalliyaan isla markaana
guulo ka gaaraan khilaafyo siyaasadeed iyo xaalado aad
uga daran mida Soomaaliya, iyadoo guddiyadaasina ay ku
baraarujin doonaan waayo aragnimadooda aqooneed.
Aqoon
isweydaarsigaasi ayaa socon doona muddo toddobaad ah,
iyadoo goobta uu seminaarku ka dhacayo ay ku sugan
yihiin madax ka socota Qaramada Midoobay, gaar ahaan
xafiiskeeda magaalada Nairobi ee ugu xilsaaran arrimaha
dalka Soomaaliya, sidoo kale waxaa furitaankii kulanka
ka qeyb galay madax ka socota Dowladda K/Afrika, kuwaasi
oo khudbado ay halkaasi ka jeediyeen ku booriyay wufuuda
Soomaalida inay lagama maarmaan tahay sidii ay ugu
istaagi lahaayeen inay damiyaan Dagaalada ka oogan
dalkooda isla markaana uu ula jaan qaadi lahaa dalalka
caalamka ee horumarka ku tallaabsaday.
www.ceegaag.com
webmaster@ceegaag.com |
