|
Degmadii 3-aad ee Gobolka
Gedo oo laga dhisey Maxkamad Islaamiya.
(G.Gado, October 23,
2008 Ceegaag Online)
Waxaa degmada Buurdhuubo ee
gobolka Gedo looga dhawaaqay maamul Islaami ah oo hoos
tagaya maamulka Islaamiga ah ee gobolka Gedo kaas oo
wax ka qaban doona Ammaanka, arrimaha la xirira
dhacwooyinka iyo is qab-qabisga dhulka iyo waxyaabo
kale .
Madaxa ammaanka maamulka
Islaamiga ah ee gobolka Gedo Maxamed Faarax Barre
Qooje oo isagoo ku sugan Degmada Buurdhuubo la
hadlayay saxaafadda ayaa sheegay inay degmada
Buurdhuubo ay ka hirgeliyaan Maamul Islaami ah oo ka
kooban 7 xubnood kuwaas oo taageero ka helaya shacabka
degmada Buurdhuubo.
Taliyaha ciidamada ammaanka
degmada Buurdhuubo ayaa waxaa loo magacaabay Maxamed
Deeq Cismaan, Gudoomiyaha maamulka degmadana waxaa loo
magacaabay Maxamuud Cabdi Barre, iyadoo guddoomiyaha
maxkamadda degmada Buurdhuubana loo magacaabay
Macallin Maxamuud Cabdi Barre.
Madaxa ammaanka Maamulka
islaamiga ah ee gobolka Gedo Maxamed Faarax Barre
Qooje ayaa sheegay inay wadayaan qorshaha ay maamul
ugu sameynayaan guud ahaan degmooyinka hoos yimaada
gobolka Gedo, isagoo sheegay inay taasi ay ka
codsadeen shacabka ku dhaqan gobolka Gedo.
Maamulkan Islaamiga ah ee laga
sameeyay Degmada Buurdhuubo ayaa noqonaya kii
saddexaad ee laga hirgeliyo gobolka Gedo, iyadoo horay
sidan oo kale maamullo Islaami ah looga dhisay
degmooyinka Ceelwaaq iyo Baardheere.
www.ceegaag.com
webmaster@ceegaag.com |
