Ogeysiis Muhiim ah
Abwaanno kaaga
yimi Geeska Afrika
&
Maalinta Qalinka iyo Suugaanta Soomaalida
28/10/2008,
Peckham Library, London
Dadka jecel
suugaanta iyo aqoon-kororsiga ee ku nool UK waxaa loogu
bishaaraynayaa fursad qaai ah. Abwaanno qalinley ah iyo
suugaanyahanno Soomaaliyeed oo xambaarsan buugaag
qiima badan ayaa ka yimi/ka imanaya Geeska Afrika si
ay Soomaalida UK uga haqab-tiraan murti ay muddo dheer
ku soo tabcayeen. Maalmo kala duwan ayay meelo kala
duwan aqoonta ay sidaan kula wadaagi doonaan
bulshaweynta UK. Maalinta la ibi furi doono waa
Salaasada, 28ka Oktoobar. Waa maalin lagu
magacaabay "Maalinta Qalinka iyo Suugaanta
Soomaalida". Barnaamij wacdara leh ayaa
maalintaas galinkeeda dambe oo dhan ka socon doona
maktabadda weyn ee casriga ah, Peckham Library,
Koonfurta London.
Waa barnaamij
hodon ah. Wuxuu ka kooban yahay daah-fur buugaag
cusub, bandhig suugaan tix iyo tiraabba leh;
bandhig buugaag qiima badan, af
Soomaali ku qoran, badankooduna cusub;
eray-murtiyeedyo iyo dood-wadaag
cilmiyaysan oo cinwaankeedu yahay "Saamaynta
Dagaallada Sokeeye iyo mustaqbalka Afka iyo Suugaanta
Soomaalida: Kaalinta Suugaanta Qoran". Heeso
lagu nasto ayaa iyana jiri doona. Waxaad fursad u heli
doontaa inaad iibsato buugaag aan meel kale laga heli
Karin ayna kuu saxiixayaan qorayaashii curiyey. Waxaa ka
mid ah diiwaankii Sayid Maxamed oo Aw Jaamac
cusboonaysiiyey, Futuuxal Xabashah oo af
Soomaali lagu tarjumay, qaamuuskii weynaa ee
Saalax Xaashi Carab, diiwaanka Xaaji Aadan Af-qalooc,
diiwaanka cusub ee abwaan Shube, Xikmadda ku
jirta Xeerka Ciisaha ikk. Buugaagta cusub ee la
daah-furi doono waxaa ka mid ah Is-dhiib oo ay qortay
Siciida Shiikh Maxamed (Belgium) iyo Barbaarinta
dhallaanka oo uu curiyey Maxamed Xasan (USA).
Intaas oo dhan waxaa
hormuud ka noqon doona ee madasha ka dhex muuqan doona
abwaannada aqoonta ka soo galbiyey Geeska Afrika, kuwaas
oo badankoodu ka imanaya Jabuuti oo noqotay xundhurta
dhaqanka iyo murtida ku qoran af Soomaaliga. Waa
abwaanno ay hor-socdaan Aw Jaamac Cumar Ciise, Aadan
Faarax, Cali Sugulle, Saalax Xaashi Carab, Maxamed C.
Riiraash, Cabdulqaadir Cabdi Shube, Yuusuf Shaacir,
Axmed Aw Geeddi, Maxamed Daahir Afrax, Cabdalle Xaaji
Ducaale, Saciida Sheikh Maxamed "VIP" oo ka imanaysa
Belgium iyo Maxamed Xasan Cismaan oo asaga iyo
buugaagtiisuba ka imanayaan Maraykanka. Murti qaali ah
waxaa dadka deeqsiin doona abwaanno iyo qorayaal reer UK
ah oo ay hormuud u yihiin Cali Seenyo, Cabdullaahi
Bootaan, Suldaan A. Shire, Martin Orwin, Siciid Jaamac,
Maxamed Baashe, Rashiid Sh. Cabdillaahi, Aamina Muuse
Weheliye, Maxamed Xasan "Alto" ikk.
Barnaamijkan waxaa
soo qabanqaabiyey Naadiga PEN (Somali-speaking Centre
of International PEN) oo kaashanaya Southwark
Council, Rockingham Somali Support Group, SOAS
(University of London), Universal TV iyo Oxford House.
Waqtiga iyo meesha:
Tuesday, 28/10/08, 1 – 5 pm at:
Peckham Library
122 Peckham Hill Street, London, SE15
2RJ
Nearest station:
Peckham Rye (British Rail). Ama ku deg Elephant
and Castle underground station oo ka qaado buses: 12,
171, 343, 63.
Wixii faahfaahin
ah, fadlan kala xiriir:-
-
Abdulkadir Farah
Jibril- 0207 4071369, 07951968799
-
Mohamed Dahir
Afrah:- 07946844033
Galitaanku waa
lacag-la'aan, cabbitaanna waa lagugu casumayaa.
