Mudaaharaad baahsan oo ka dhacay magaalada Laascaanood

(Laascaanood, October 20,  2008 Ceegaag Online)

Markii ay dhacday dowladii dhexe ee Soomaaliya oo ay qax iyo qaxooti u badatay, qof waliba meeshii uu ehelkiisa ku ogaa ayuu u cararay, waxaana aad u adkaatay noloshii.
 
Dadka qaarkood waxay aadeen miyiga oo dad eheladooda ah xoolo ku haystaan, kuwo kalana waxay tageen magaalooyinka waaweyn oo ay Buushash iyo Sandaqado ka dhisteen si ay noloshooda uga raadsadaan.
 
Sandaqadahaasi waxay saaran yihiin laamiga ama meeshii banaaneydee baabuurtu baakinka ka dhigan jireen
 
Hadaba saaka 8:00 subaxnimo ee saaka ayaa magaalada Laascaanood waxaa ka bilowday mudaaharaad ay wadaan dadkii iska lahaa sandaqadaha, kaas oo ay kaga soo horjeedaan Maamulka SomaliLand oo ku dhaqaaqay inay dumiyaan sandaqadaha iyo buushashka saaran wadooyinka waaweyn ee magaalada.
 
Waxaa xusid mudan in dadka iska leh sandaqadahaasi in badan oo ka mid ahi aanay awoodin inay meel kale ka dhistaan sandaqadahooda, waayo dadku waxay u badan yihiin  dad qaxooti ah oo ka soo qaxay dagaaladii ka dhacay Soomaaliya, gaar ahaan magaalo madaxdii MUQDISHO.
 
 
Waxaa kale oo iyana jira in maamulka SL ee gacanta ku haya Gobolka Sool aanu wax digniin ah siin dadkaas, in kasta oo aanay hada shaqayn Idaacadii madniga  ahayd ee magaalada, hadana waxay samayn karayeen inay isticmaalaan Makarafoono iwm.
 
                     Gebogebadii waxaa meesha ka maqan oo aan jirin Cuqaashii iyo odayaashii u dhaxayn lahaa maamulka iyo dadka shacabka ah.
 
 
                      X.WARARKA CEEGAAG ONLINE
                                     LAASCAANOOD

webmaster@ceegaag.com